Biscoito de espelta con papaia e banana

Vén o sol e veñen as ganas de produtos de tempada, frescos. Apetecen cada vez máis as froitas. E aí por sorte temos onde escoller, ben para as degustar por si soas, que xa son un manxar, ou ben para facermos larpeiradas algo máis saudábeis.

E esta quedou para non deixar migalla. O que máis chama a atención é a súa esponxosidade e o ben que se conserva a pesar do paso dos días. Nós preparámolo o pasado luns e os últimos anacos que quedaban a final de semana estaban igual que o primeiro día. E isto simplemente deixándoo protexido no forno.

Por aquí papouse só, con crema de cacao, mollado en leite... de mil xeitos e igualmente exitoso en todas. Nós que temos algo aborrecido o biscoito tradicional de iogur, agradecemos moitísimo estas novas posibilidades. De feito, é raro que repitamos biscoito, mais con este talvez teñamos que facer unha excepción...

Biscoito de espelta con papaia e banana

Ingredientes:

• 200 gr de papaia
• 2 bananas
• 150 gr de fariña de espelta   
• 100 gr de azucre
• 3 ovos
• 1/2 vaso de aceite
• 1 sobre de lévedo

Utensilios: un batedor eléctrico, o vaso do batedor, unha cunca grande, un molde e unha espátula ou batedor manual.

Elaboración:

Para comezarmos, troceamos as froitas e colocámolas no vaso do batedor. 

Engadimos o aceite e o azucre. 

Trituramos até termos un puré. 

Agregámoslle os ovos e o lévedo e mesturamos moi ben. 

Despois a fariña e seguimos mesturando. 

Botamos a mestura no molde. 

Enfornamos a 170º, calor abaixo e  ventilador, durante, aproximadamente, 40 minutos. Deixamos que arrefríe, deslmoldamos e xa está listo para comer! 

Como vedes, un doce delicioso, rápido de facer e moi saudábel. E non vos ha de supor traballo ningún porque quen vos ha enseñar a vós a facer biscoitos? Ningúen! É cuestión de ofrecermos alternativas e outras posibilidades para que cada quen vaia escollendo. Iso si, esta recomendámosvola moi encarecidamente. E senón, probade e xa nos diredes.
Fortísimas apertas, lambonciñ@s! Lémonos :-)