Torta terrorífica Jack Skellington (con crema pasteleira e froitos vermellos)

Bo día, bolboreteirxs! Aquí estamos de novo cunha nova receita para estas datas samaínicas. Neste caso, é unha torta moi sinxela na que xogamos coa masa, a crema e os froitos vermellos. O especial deste pastel é que é pechado e imos decorar a parte superior, neste caso fixemos a Jack Skellington, mais podedes facer o debuxo que máis vos guste. 

Unha das múltiplas ideas que nos dan estas datas para crear cos peques a cociña. O noso Xiao está a tope estes días entre castañas, cabazas e doces terroríficos.

Así que aquí van os ingredientes e o paso a paso para poñerlle un pouco de sabor aos días de Defuntos e Santos. Adiante!

Torta terrorífica Jack Skellington 

Ingredientes: 

• 2 láminas de masa crebada     
• 750 ml de crema pasteleira 
• 400 g de froitos vermellos 
• 60 g de azucre 
• O zume dun limón 
• 1 ovo

Utensilios: un molde redondo apto para o forno, dúas potas, unha espátula, un coitelo e un batedor manual. 

Elaboración: 

Para comezarmos, temos de facer a crema pasteleira. Aquí vos deixamos o paso a paso. Reservamos. Se imos facer nós a masa crebada tamén sería o momento, nós, neste caso, mercámola. 

De seguir, facemos a marmelada de froitos vermellos. Para iso, temos que botar nunha pota os froitos vermellos, xunto co azucre e o zume do limón. 

Mesturamos ben e cociñamos 25-30 minutos a lume medio. Deixamos que arrefríe un pouco. 

E chegou a hora de montar a nosa torta! Para iso, colocamos unha lámina da masa crebada no noso molde. 

De seguir, a crema pasteleira e os froitos vermellos.

E, coa outra lámina de masa temos de facer o debuxo coa axuda dun coitelo. 

E tapamos a torta con ela. 

 

Batemos o ovo e pintamos a masa para que quede máis dourada no forno. E enfornamos a 220º, calor arriba e abaixo, durante 30-35 minutos. 

Deixamos arrefríar un pouco e xa estaría lista para comer! 

Agardamos que vos guste e que poñades en práctica esta horripilante torta. 

Que terrorífica, verdade? E que delicia cuns ingredientes bastante básicos. Esta torta é momi vistosa para acabar unha comida con amigxs ou familiares, ou incluso se ides facer algunha festa por Samaín. A nós, aínda nos quedan un par de receitas de Samaín por compartivos, mais son moi moi fáciles. Agardamos que vos guste e que gocedes destes días samaínicos.