Madalenas de chocolate terroríficas

Bo día, bolboreteirxs! Hoxe traémosvos a primeira receita de Samaín. Esta é unha das nosas épocas favoritas do ano: disfraces, decoración, festas e uns ingredientes para traballar moi moi saborosos. Unhas deliciosas madalenas moi moi chocolateadas. Son deliciosas e cunha textura incríbel. Ademais, podémolas decorar como máis nos gusten, nós decidimos facer uns monstros e unhas pantasmas. 

Madalenas de chocolate terroríficas    

Ingredientes:

Para as madalenas:

• 200 g de chocolate negro (ou con leite) 
• 200 g de nata 35% 
• 150 g de fariña         
• 75 g de azucre 
• 20 g de chocolate en po 0% 
• 2 ovos 
• 1 cullerada de lévedo en po 
• 1 cullerada de vainilla 

Para a decoración:

• Crema de cacao e abelás 
• Fídeos de chocolate 
• Fondant (ou ollos comestíbeis) 
• Decoracións samaínicas 
• Nubes

Utensilios: moldes para madalenas, unha cunca e un batedor (eléctrico ou manual), cápsulas para madalenas e varias cuncas pequenas para a decoración. 

Elaboración:

Para comezarmos, temos de facer as madalenas. Para iso, temos de separar as xemas das claras. Reservamos as claras e batemos as xemas co azucre até que dupliquen o seu tamaño. 

De seguir, engadimos a nata e a vainilla e batemos de novo.

Derretemos o chocolate e botámolo á mestura anterior. Noutra cunca, batemos a fariña, o chocolate en po e o lévedo e incorporámolo á mestura anterior. Reservamos.

Montamos as claras a punto de neve e agregámolos con movemento envolventes á mestura anterior. 

Repartimos a masa nas cápsulas, colocadas no molde, e enfornamos a 180º, calor arriba e abaixo, durante 22-23 minutos. Deixamos que arrefríen. 

E chegou a hora de decorar as nosas madalenas. Quentamos un pouco a crema de chocolate e abelás e bañamos as madalenas nelas. 

A continuación, botamos a unhas os fídeos de chocolate e a outras as decoracións samaínicas. 

Para facer as pantasmas, temos que coller as nubes e pórlles unha pouca de crema de cacao e un pauíño para facer as caras. E, para facer os monstros, podemos mercar os ollos xa feitos ou facelos con fondant branco e negro, como fixemos nós. 

E xa estarían listas para comer! Esperamos que vos gusten e que poñades en práctica esta receita. 

Que absoluta delicia, ademais son ideais para facer cos peques da casa, que deixen voar a súa imaxinación e decoren as madalens ao seu gusto. Teñen un sabor a chocolate intenso polo que son irresistíbeis, e adictivas, avisadxs quedades! 

  

Agora, contádenos, xa empezastes coas castañas e as cabazas? Que plans tedes para Samaín? Disfraces? Truco ou trato? Ou simplemente desfrutar da familia cunhas receitas deliciosas? 

Aoerta fortísima, bolboreteirxs!