martes, 9 de xullo de 2019

Niños de ovo

Olaaaaa!!! Seguimos creando aproveitando o tempo que nos ofrece o verán para ler, visualizar e saborear. Estivemos aprendendo estes días que os ovos son bastante recomendábeis durante o embarazo e como non estaba comendo moitos decidimos matinar unha receita que lle dese todo o protagonismo ao ovo, variando así das formas clásicas.
E xa vedes ao que chegamos, unha creación orixinal e con moito máis sabor do que se pode mostrar en ningunha imaxe xa que esa pseudoclara do ovo alberga unha intensidade dificilmente esquecíbel para o padal.
Probade a poñerlle estes niños de ovo á xente da casa a ver que vos din. Van flipar! Ollade que pouco para lograr un prato saborosísimo!!




Niños de ovo



Ingredientes:

  • 2-3 ovos
  • 3 lascas de bacon
  • 2 culleradas de queixo parmesano
  • Ourego
  • Pementa moída
  • Sal




Utensilios: dúas cuncas, unha bandexa do forno e papel vexetal, un batedor eléctrico (ou un bo brazo).


Elaboración:


Para comezarmos, temos de separar as claras das xemas. 


A continuación, montamos as claras cun chisco de sal. 


Engadímoslles o bacon, cortado en cadradiños, e o parmesano. Tamén a pementa moída e o ourego ao gusto. 




Mesturamos moi ben e facemos círculos na bandexa de forno, cuberta con papel vexetal. No centro, fariamos un oco para pór despois a xema. 


Enfornamos a 220º, calor arriba e ventilador, co forno prequente, durante 2-3 minutos. 


Pasado ese tempo, colocamos as xemas sobre cada ovo. Hai que colocalas con coidado, mais non vos preocupedes se rompe algunha, a nós tamén nos pasou, haha. E enfornamos 2 minutos máis. 


Podemos servir acompañados de patacas ao forno, pan, ensalada... ou o que prefirades ;). 


Agardamos os vosos resultados para comprobar o éxito da receita. Aquí conquistounos tremendamente. Sede moi felices. Aperta forte, amig@s!

2 comentarios: