sábado, 14 de xullo de 2018

Falafel de lentellas e quinoa

Bo día, bolboreteir@s! Por Viveiro estamos con moito rock e metal co Resurrection Fest aínda que nós só temos ollos para as opos de momento. Así que o que realmente nos fai resucitar son pratos como o que hoxe presentamos, con propiedades múltiplas e unha chea de sabor.
Xa sabemos que sodes moitos os amigos e amigas do falafel, mais talvez non experimentastes nunca con variantes do mesmo. Segue a ser un prato vegano, claro, mais cambiando practicamente boa parte dos ingredientes e dando o protagonismo dos garavanzos a outro legume: as lentellas, tan adoradas por moitos de nós.
Ides ver ademais que non ten apenas complicación sexades mellores ou peores cociñeir@s. 
Xa sabedes, se queredes sorprender, velaquí tedes un prato ben gustoso! 



Falafel de lentellas e quinoa


Ingredientes:

  • 400 g de lentellas cocidas
  • 150 g de cenoria relada
  • 100 g de copos de quinoa
  • 1 cebola relada
  • Coantro ao gusto
  • Pementa moída
  • Sal
  • Aceite de oliva
  • Tortillas de trigo/millo (opcional)
Para a salsa de iogur:
  • 1 iogur natural
  • O zume dunha lima
  • Pementa moída
  • Sal

Utensilios: unha cunca, un relador, papel transparente, unha tixola e un prato con papel absorbente. 



Elaboración:


Para comezarmos, mesturamos as lentellas coa cenoria. 



Engadimos a cebola, tamén relada. 


Agregamos os copos de quinoa, o coantro e salpementamos ao gusto. 


Mesturamos moi ben. 


Tapamos con papel trasparente e refrixeramos unha hora, como mínimo. 


Mentres tanto, facemos a salsa iogur. Para iso, mesturamos o iogur co zume da lima, a pementa moída e o sal. Refrixeramos. 


Pasada esa hora, facemos boliñas coa masa das lentellas e a quinoa. 


E fritímolas nunha tixola cun pouco de aceite. 


Cando estean fritas, colocámolas sobre papel absorbente. 


E servímolas acompañadas de tortillas de trigo (ou millo) e a salsa de iogur. 


 Agardamos que vos guste e que poñades esta deliciosa receita en práctica, xa que é moi saudábel e sinxela. 


Esta receita que adaptamos de My Little Things trouxo moitísimo sabor. 
Mollamos, se quixermos, en salsa iogur e acompañamos deste pan en tortillas para facer un prato ben completo e apetecíbel para o que non fai falta apenas máis que desfrutar. Ímonos lendo, amig@s! Boa fin de semana!

Ningún comentario:

Publicar un comentario