Spaguetti picantes con xamón

Co que nos gusta Italia e a súa cociña non sei como aínda non tiñamos subido ningunha receita de pasta... Hoxe presentámosvos unha das nosas receitas sinxeliñas preferidas, que xa vimos facendo desde hai moitos anos; claro, a pasta é do primeiro que se aprende a facer... Un dos mellores recursos gastronómicos para o estudantado J 

Os spaguetti son moi económicos e podemos elaboralos de moi diversas formas, escolléndomos nós acompañalos dun produto estrela, o xamón. É por tanto unha receita ao alcance de principiantes da cociña e  pensada para @s que gustades do picante. Aquí vos traemos uns especiais spaguetti picantes con xamón:

 Spaguetti picantes con xamón

Ingredientes:

• 300 gr de spaguetti
• 100 gr de xamón
• 2 dentes de allo
• 2 chiles
• Queixo relado
• Pementa
• Ourego
• Alfábega
• Aceite de oliva
• Sal
  

Elaboración:

Para comezarmos temos de cocer os spaguetti en abundante auga fervendo cunha cullerada de aceite de oliva e sal. Para sabermos se están cocidos probamos un (outro truco é tirar un contra un azulexo e se se queda pegado é que está perfecto). Escoámolos e reservamos.

 

 A continuación, botamos nunha tixola dúas culleradas de aceite e rustrimos os dentes de allo picados co chile e un pouquiño de xamón, para que estean máis saborosos.

De seguir, engadimos os spaguetti e o resto do xamón. Mesturamos ben e fritimos durante 5 minutos.

Botamos o queixo relado, a pementa, a alfábega e o ourego e, de novo, mesturamos. Deixamos se que fagan ben na tixola e xa estarían preparados!! Podédelos comer así ou engadíndolles salsa de tomate, mellor se é caseira, que tamén lles dará un toque moi especial.  

Como vedes, realmente fáciles de facer. Un prato de moito sabor, que nos achega os hidratos de carbono e proteínas necesarias para un bo xantar. E se tedes pensado facer deporte pola tarde, aínda máis recomendábel comer antes este pratiño de pasta. Desfrutádeo;-)