Tortitas 🥞

 Bo día, bolboreteirxs! Que tal vai a semana? Nós estamos desexando que chegue a finde, que temos unha pequena viaxe moi especial, mais mentres esperamos traémosvos unha nova receita. 

Como ben sabedes, o domingo pasado foi o Día da Mamá e fixemos en familia estas deliciosas tortitas para almorzar. Aínda que xa tedes outra receita en Bolboretas no bandullo delas, quixémola actualizar. A diferenza principal é que estas quedan máis gordiñas, así que podedes escoller a elaboración que máis vos guste. 

Na nosa casa hai gustos moi diversos para acompañalas, incluso hai quen as come soas: marmelada, crema de cacahuete, crema de abelás, lacasitos, froita... Xa nos diredes de que as acompañades vós.

Aquí vos deixamos a receita:

Tortitas

Ingredientes:

• 375 g de buttermilk (leite + zume dun limón)        
• 230 g de fariña
• 2 culleradas de AOVE
• 1 ovo
• 1 cullerada de azucre moreno
• 1 cullerada de vainilla
• 1 culleriña de lévedo en po
• 1 culleriña de bicarbonato

Utensilios: dunhas cuncas, un batedor, unha tixola e unha espátula. 

Elaboración:

Para comezarmos, temos de facer o buttermilk. Para iso, mesturamos o leite co zume dun limón e reservamos 10-15 minutos. 

De seguir, engadimos o aceite.

A vainilla. 

E o ovo. Reservamos. 

Por outra banda, mesturamos os ingredientes secos: a fariña, o azucre, o lévedo e o bicarbonato. 

Agregamos a esta mestura, o resto dos ingredientes. 

E mesturamos moi ben. Deixamos repousar 10-15 minutos, mentres preparamos os ingredientes cos que as imos acompañar.  

Pasado ese tempo, collemos unha tixola e botámoslle unhas gotiñas de AOVE. Imos botando a masa, nós usamos a culler do xeado para facelas todas iguais. Cando empecen a saír burbullas, damos a volta e deixamos uns segundos máis. Nós, cando as sacamos, tapámolas cun pano para que manteñan a calor. 

Cando as teñamos todas, acompañámolas dos ingredientes que máis nos gusten e listas para comer!

Como vedes son ideais para facermos en familia e gozarmos dun almorzo tranquilo de fin de semana. Aos peques encántalles ver como van saíndo as burbullas e despois acompañalas do que máis lles guste. E así imos vendo quen son os máis lambóns e lambonas de cada casa.

Oxalá vos gusten!

Lémonos!

Aperta forte, bolboreteirxs!