sábado, 26 de maio de 2018

Tortitas americanas

Bo día, bolboreteir@s! Pensabamos que estabamos ás portas do verán e... volta á realidade! Isto é Galiza, haha! Mais ben, hoxe non imos cunha receita galega. Máis ben, imos cunha receita moi distante, moi ianqui. De feito, pode parecer algo redundante o título que lle damos mais é para mostrarmos que esta receita segue con bastante fidelidade a clásica estadounidense.
De feito, traémosvolas aínda quentiñas pois levantámonos, abrimos a persiana e vendo este día, apeteceunos darnos unha homenaxe no almorzo e aí foi onde entrou en xogo esta larpeirada. 
Vede que nós fixemos unha cantidade non moi grande porque como máis nos gustan son acabadas de facer, quentiñas, provocando que o chocolate se derrita, mmm... Que lambociños somos!
Imos por elas!


Tortitas americanas



Ingredientes:

  • 140 ml de leite
  • 130 g de fariña
  • 2 culleradas de azucre
  • 2 culleradas de aceite
  • 1 cullerada de vainilla
  • 1/2 culleriña de lévedo
  • 1 ovo
  • Un chisco de sal

Utensilios: un vaso batedor, un batedor eléctrico, unha tixola e unha espátula.



Elaboración:


Para comezarmos, mesturamos no vaso batedor o ovo, o azucre...



O aceite, a fariña, a vainilla e o lévedo. 


Trituramos moi ben a mestura. Deixamos repousar 10 minutos.


Quentamos a tixola e engadimos unha pouca da mestura. Cando lle empecen a saír burbullas, dámoslles a volta, coa axuda da espátula, e cociñamos 1 minuto máis.  E repetimos o proceso até acabar coa nosa masa. 


 Servimos as tortillas nun prato! Podémolas acompañar cunha pouca de froita e chocolate, ou con nata, marmelada... ou o que máis vos guste 😉.


Agardamos que vos gusten e que poñades en práctica esta deliciosa receita!


Non son un almorzo ideal para todos os días, nin por cuestións alimenticias nin por cuestións temporais, mais é un prato moi axeitado para a fin de semana, cando nos podemos permitir o luxo de investir 10 minutos nun almorzo un tanto diferente e moi moi saboroso!
Deixámosvos aquí este clásico para terdes como referencia e non perder. Forte aperta!

1 comentario:

  1. Uummmmmmmmmmm de rexupete no lo siguiente dan ganas de liarse a dentelladas con el monitor ,os han quedado de relujo.
    Bicos mil wap@s.

    ResponderEliminar