Lasaña de cabaciña (sen pasta)

Bo día, bolboreteir@s!! Como levades o día? Deixando xa atrás a semana grande das Letras Galegas, seguimos hoxe e sempre co compromiso co noso idioma e coa nosa cultura, que a fin de contas son os que sinais de identidade deste blogue focado na nosa paixón gastronómica.

Preparando a cea cuns amig@s chegamos á idea que hoxe vos presentamos e que vai na liña das que logran o éxito seguro pois hai certos vexetais como a cabaciña que deberían ter monumentos nas nosas cociñas debido ao xogo que nos dan.

Desta volta, emerxe nun dos pratos máis famosos da gastronomía italiana, a lasaña, na que substituímos as placas de pasta polas láminas de cabaciña.

Imos pois, coa nova creación!

Lasaña de cabaciña

Ingredientes:

• 2 cabaciñas
• 200 g de lascas de xamón cocido
• 150 g de lascas de queixo
• Queixo relado
• Pementa moída
• Allo en po
• Sal
• 1 culleriña de aceite

Utensilios: unha fonte apta para o forno, un pincel, unha mandolina (ou táboa e coitelo).

Elaboración:

Para comezarmos, cortamos as cabaciñas coa mandolina. botamos a cullerada de aceite na fonte e estirámola coa axuda do pincel. Colocamos unha capa de lascas de cabaciña e adobámolas con pementa moída, allo en po e sal, ao noso gusto. 

Poñemos unha capa de xamón cocido e queixo.

Cubrimos con máis cabaciña, sazonamos e repetimos para facermos 2-3 capas. 

Cubrimos a superficie con queixo relado e empoamos con ourego. 

Enfornamos a 200º, calor arriba e abaixo, durante 20-25 minutos. 

Servimos e xa estaría lista para comer! 

Agardamos que vos guste e que poñades en práctica a receita :).

Apetecíbel, non é? Moito máis lixeiro e canto a sabor, veredes que non ten nada que envexar. Estamos agardando impacientes a que nos comentedes os vosos resultados e impresións. 

Agora é a vosa quenda. Forte aperta, amig@s!