Tacos de polo ao curry

Hai uns días os nosos amigxs de Quinteiro doce, dos que somos fans desde hai ben tempo, ensináronnos as súas especias de Quinteiro 13, na que teñen unha gran variedade e sobre todo, unha pintaza incríbel. Propuxéronnos escoller algunhas para traballar con elas e non foi tarefa doada. O noso propósito finalmente foi elaborar unha receita salgada e unha doce e hoxe ímosvos presentar a primeira.

Tacos de polo ao curry

Ingredientes: 

• Tortillas de millo pequenas
• 1 aguacate 🥑 
• 1 lima    

Para o polo ao curry: 

• 1 peituga de polo
• 1 bote de leite de coco
• 1 cullerada de curry de Quinteiro 13
• 2 dentes de allo 🧄
• O zume de media lima
• AOVE

Para a cebola encurtida: 

• 2 cebola moradas 
• 1 vaso de auga
• 1 vaso de vinagre branco
• 1 cullerada de azucre
• 1/2 cullerada de sal

Para o pico de galo:

• 1 tomate pequeno
• 1 cebola pequena 
• Zume de 1 lima
• Coantro
• Sal

Utensilios: unha tixola ou un wok, e outra tixola, unha pota/fritifeira de aire/forno, papel de prata, táboa e coitelo, un bote (mellor hermético) e unha cunca, tamén varias culleres.

Elaboración:

Para comezarmos, temos de facer a cebola encurtida. Para iso, cortamos a cebola en xuliana e metémola nun bote. Reservamos. 

De seguir, quentamos a auga, o vinagre, o sal e o azucre até que se integren todos os ingrendientes, aproximadamente 2-3 minutos. 

   

Vertemos o líquido sobre a cebola. Pechamos o bote e axitamos para empapar a cebola. 

Reservamos durante 2-3 horas, nas que veremos como a cebola se volve dunha cor rosa, e xa estaría lista para usar. 

Para o polo, temos de cocer ou asar a peituga. Nós empaquetámola con papel de prata e cociñámola 25 min na fritideira de aire a 180º. Deixamos que arrefríe un pouco e desfacémola coas mans, coma se estivesemos separándoa en fíos. 

     

A continuación, rustrimos en 2 culleradas de AOVE o allo picadiño, cando empece a cambiar de cor agregamos o curry de Quinteiro 13, mesturamos e cociñamos 1 min máis. 

Botamos o polo e remexemos para que se impregne ben do curry. 

Engadimos o leite de coco e cociñamos, a lume medio, durante 14-15 minutos. Botamos o zume de lima e apagamos o lume. Reservamos. 

Para facermos o pico de galo, temos de picar o tomate 🍅 e a cebola 🧅 e aliñalas con zume de lima, coantro e sal. Reservamos. 

Empezamos a montaxe dos tacos. Comezamos quentando as tortillas 15 seg por cada lado a lume forte (nós humedecímolas antes) e colocamos, primeiramente, o polo, despois o pico de galo, o aguacate -cortado en láminas- e a cebola encurtida. Repetimos a operación as veces que queiramos. Para isto, o ideal é preparar a Mise en place e ter todo colocado na mesa (ou encimeira) para que sexa máis sinxelo facelo. 

Servimos acompañando os nosos tacos 🌮 de máis lima, para quen lle apeteza, e xa estarían listos para comer. 

Agardamos que cos gusten e poñades este prato en práctica.

Que vos parece? Aínda que vexades que son moitos pasos, son moi sinxelos e fanse rápido. Ademais, merecen totalmente a pena. O curry, que é un básico sempre na nosa alacena, é o elemento principal desta receita xa que é o que lle vai dar todo o sabor. O curry de @ é espectacular, tanto polo sabor que lle achega aos ingredientes, como pola cor que lles ofrece. Menuda elección a nosa 🤤 

Lémonos! Aperta forte, bolboreteirxs 🥰❣️