Pizza outonal

Bo día, bolboreteirxs! Aquí estamos un día máis cunha nova receita outonal, cuxa protagonista é a cabaza. Esta é unha nova versión da pizza, xa que en lugar de facer unha blanca ou con salsa de tomate, imos usar a cabaza, o que lle dará un toque diferente, e moi especial á nosa pizza. Para o resto dos ingredientes nós facémosvos esta proposta, que triunfou na nosa casa, mais xa sabedes que hai que xogar cos produtos e os nosos gustos. 

Pizza outonal  

Ingredientes:

Para a pizza:

• Masa de pizza 
• Puré de cabaza 
• Chistorra        
• Champiñóns 
• Cebola 
• Queixo de cabra 
• Queixo relado ao gusto 

Para o puré de cabaza:

• 400 g de cabaza 
• 2-3 dentes de allo
• Tomiño 
• Pementa moída 
• Sal 
• Aceite 

Utensilios: unha cunca, unha fritideira de aire (forno ou pota), unha táboa e un coitelo, unha bandexa apta para o forno e papel vexetal. 

Elaboración:

Para comezarmos, temos de facer a masa da pizza, a que máis vos guste. En Bolboretas no bandullo tedes varias opcións para todos os gustos. Nós, desta volta, fixémola con fariña integral. Reservamos. 

De seguir, facemos a crema de cabaza. Para iso, cortamos a cabaza en anacos pequenos, engadímoslle os dentes de allo (enteiros), o tomiño, a pementa moída, o sal e o aceite. 

Nós cociñámola na fritideira de aire a 205º durante 18 minutos, mais podédela facer no forno ou incluso ao vapor. 

Triturámola moi ben co batedor eléctrico. 

E chegou a hora de montar a nosa pizza! Despois de estirarmos a masa do tamaño que necesitemos, estendemos unha capa da nosa cabaza. 

A continuación, agregamos o queixo de cabra.

A chistorra. 

Os champis. 

A cebola. 

E rematamos con queixo relado. 

Enfornamos a 250-260º, calor arriba e abaixo ou función pizza, durante 12-15 minutos.

E xa teríamos lista a nosa comida! 

Agardamos que vos guste e que a poñades en práctica. 

Unha pizza orixinal e diferente ao que estamos afeitxs normalmente. O toque doce da cabaza combina á perfección co sabor da chistorra e o queixo de cabra. Como vedes, é un prato moi sinxelo para aproveitarmos os produtos de tempada, e atrevérmonos a introducir a cabaza nas nosas receitas. Así que aquí vos deixamos unha nova idea para facerdes estes días de choiva. 

Aperta forte, bolboreteirxs!!