mércores, 10 de maio de 2023

Brigadeiros

Bo día, bolboreteirxs! Que tal? Con motivo do Día da Nai (7 de maio) pedíronnos desde A Voz unha receita para podermos facer con peques e celebrar ese día tan especial. A Xiao encantoulle meterse na cociña con mami para poder facer unha lambetada, e iso que el non é moi lambón. Aínda que xa tiñamos fichada esta receita, un alumno trouxo brigadeiros caseiros un día á clase e fiquei namorada deles. 

Os brigadeiros son típicos da cociña brasileira e non faltan en ningunha celebración. Son similares aos nosos bombóns xa que cando se meten na boca, desfanse deixando un sabor espectacular a chocolate. Aquí tedes a súa receita, coa que sorprenderedes a todos os comensais e oxalá que á mamá en especial!



Brigadeiros


 

Ingredientes:


  • 400 ml de leite condensado
  • 35 g de cacao puro         
  • 30 g de  manteiga
  • Para a decoración: boliñas de cores, cacao, fideos de chocolate…




Utensilios: un cazo, un recipiente, unha espátula e varios platos. 
 

Elaboración:


Para comezarmos, temos de derreter a manteiga nunha tixola, a temperatura media-baixa.


De seguir, agregamos o leite condensado e mesturamos até que se integren perfectamente, tardaremos sobre 2-3 minutos. 


Botamos o cacao e po.


 E mesturamos moi ben. 


 Temos de bater até que a mestura espese e, se pasamos a espátula, deixe unha liña limpa.


 Botamos a crema nun recipiente e deixamos repousar, a temperatura ambiente, até que arrefríe.


De seguir, collemos pequenas porcións cunha culler pequena e, coa axuda das mans, ímoslles dando forma de bola.

 

 Cando teñamos a forma desexada, pasámola polas boliñas e xa estarían listos para comer! 


Agardamos que vos gusten e que poñades a receita en práctica. 


Unha receita moi sinxela e ideal para preparar cos máis peques da casa, só temos que vixiar ben cando temos a tixola encendida. Será un momento moi especial tanto se son para regalar coma se é para pasar un feliz momento en familia. 

1 comentario:

  1. Tão simples de se fazerem,...
    Votos de um excelente fim-de-semana!
    Beijinhos,
    Espero por ti em:
    strawberrycandymoreira.blogspot.pt
    http://www.facebook.com/omeurefugioculinario
    https://www.instagram.com/marysolianimoreira

    ResponderEliminar