Torta de queixo con marmelada (sen forno)

Boa noite, bolboreteir@s. Como estades?? Nós tivemos unha fin de semana moi lambona. Aproveitamos para estar con amizades que hai tempo non estabamos e para cociñarmos moito: lasagna, croquetas, costela e... unha sobremesa de peso: torta de queixo. 

A verdade é que estamos ante un clásico co que nós non encaixamos demasiado. Parece pois contraditoria a receita, claro. Pero explicámonos. Moitos das tortas de queixo que temos probado por restaurantes e demais presentan para nós un sabor moi intenso polo que  xa rara vez as pedimos de sobremesa. Mais a semana pasada gardáronnos un cacho uns veciños que tiveran a peque de aniversario. E vaia, gustounos moito. E por que non lle damos outra oportunidade?

E así foi, ante a visita que tiñamos o sábado, preparamos unha torta de queixo fría, seguindo a receita desta amiga, moi sinxela e demos cun resultado espectacular: moi lixeira e  sabedeira. Ollade!

Torta de queixo con marmelada 

Ingredientes:

Para a base:

• 300 g de galletas tipo digestive
• 110 g de manteiga

Para a crema:

• 400 g de queixo crema      
• 250 ml de agua
• 200 g de nata para cociñar
• 30 g de azucre
• 1 sobre de xelatina de limón

Para a decoración:

• Marmelada de amorodos
• Amorodos

Utensilios: unha picadora, unha pota, un molde desmoldábel e un batedor manual.

Elaboración:

Para comezarmos, temos de triturar as galletas e mesturalas coa manteiga a temperatura ambiente.

 Cubrimos o fondo do molde e arrefriamos.

Mentres tanto, facemos a crema. Fervemos a auga, apagamos e botamos a xelatina de limón, a nata, o queixo e o azucre. 

Mesturamos ben e botamos a mestura sobre a galleta. Arrefríamos, mínimo 3-4 horas.

De seguir, botamos a marmelada cubrindo toda a torta e decoramos cuns amorodos.

Desmoldamos e xa estaría lista para comer! Agardamos que vos guste! Boa pinta pero mellor sabor, veredes. Forte aperta, bolboreteir@s!