"Mac and cheese" veganos

Boa noite, bolboreteir@s! Como vai todo? Nós aínda chegamos agora á casa que estivemos de noreo así que a publicación de hoxe vai case que nocturna.

Imos con todo un experimento dese mundo que nós adoramos como o da cociña vegana. Parécenos unha das mellores opcións para procurarmos creatividade e introducirmos produtos novos na nosa alimentación. De feito, desta volta coñecemos o lévedo nutricional, que é o que achega o sabor similar ao do queixo e botamos man da cabaza que tampouco é moi frecuente nesta cociña nosa. Ollade que ideaza!

"Mac and cheese" veganos

Ingredientes:

• 400 g de macarróns
• 400 g de cabaza
• 200 g de leite de avea
• 3-4 culleradas de lévedo nutricional
• 2 culleradas de aceite de oliva
• O zume de medio limón
• Cebola en po
• Allo en po
• Pementa moída
• Sal 
• Para decorar: alfábega

Utensilios: unha bandexa de forno e papel vexetal, unha pota, unha cunca, un batedor eléctrico e unha culler de pau.

Elaboración:

Para comezarmos, cocemos a pasta e reservamos. Nós escollemos os macarróns do tipo "tiburón", xa que non encontramos os típicos dos "mac and cheese". 

Menres tanto, temos de pelar e cortar a cabaza para asala no forno, a 200º, calor arriba e abaixo, aproximadamente, 30 minutos.

Nunha cunca, botamos a cabaza, o leite, o lévedo, o zume e o aceite e sazonamos, ao noso gusto, coa cebola, o allo, a pementa moída e o sal. 

Trituramos moi ben co batedor eléctrico. 

Na mesma pota en que cociñamos os macarróns, mesturámolos coa salsa e cociñamos 2-3 minutos para que collan todo o sabor. 

Servimos e botamos un chisco de alfábega para decorar. 

E xa estarían listos para comer! Agardamos que vos gusten! Aquí foron recibidos con moito entusiasmo e marcharon con rapidez, claro. Aperta forte, bolboreteir@s!