Salmón con capa e verduras

Bo día, bolboreteir@s! Como estades? Agardamos que xa recuperados dos excesos do Nadal e adaptados de novo á rutina, canto menos alimenticia. Nós seguimos coa nosa actividade blogueira, presentándovos opcións que nos conquistan a nós previamente.
Ben, o salmón é talvez o noso peixe favorito xunto co peixe-sapo e a verdade é que estamos moi acomodado a facelo na tixola sen máis que unha gota de aceite. Que é ben cómodo para o día a día e tamén unha delicia. Porén, convén non aborrecelo tampouco así que matinamos nesta nova opción, tamén bastante saudábel e con moita novidade no sabor. Ollade!

Salmón con costra e verduras

Ingredientes:

• 2 toros de salmón
• 1 cebola
• 1/2 pemento vermello
• 1/2 pemento amarelo
• 3-4 champiñóns
• 2 galletas mariñeiras
• 30 g de améndoa crúa
• 30 g de cereais de millo
• Ourego
• Pementa moída
• Sal
• Aceite de oliva

Utensilios: unha tixola, unha fonte apta para o forno, unha táboa e un coitelo.

Elaboración:

Para comezarmos, temos de cortar os pementos e a cebola en xuliana e rustrímolos en dúas culleradas de aceite. Sazonámolos ao noso gusto coa pementa, o ourego e o sal. 

Pasados 5 min, agregamos os champis, cortados en catro. Cociñamos 3 min máis.

Despois dese tempo, botamos as verduras na cunca que irá ao forno.

Colocamos o salmón e salgamos ao noso gusto.

Á parte, mesturamos as galletas, os cereais e a améndoa e machacámolos para ter anacos pequenos e cubrimos con eles o salmón.

Enfornamos, co forno prequente a 180ª, calor arriba e abaixo, durante 15 min.

E xa estaría listo para comer! Agardamos que vos guste. Vedes que podemos preparar o salmón dun xeito moi novidoso con ben pouco traballo. Resulta ben interesante, especialmente para os fans deste peixe, tal e como somos nós. Agardamos que lle deades proveito. Forte aperta, amig@s!