Tosta de solombo e queixo de cabra

Boa tarde, bolboreteir@s! Como vai todo? Aquí andamos con avaliacións antes das vacacións e aproveitando os temporais para seguir creando.
Desta volta imos cunha tosta, un clásico de moitas tascas galegas que xa había tempo que non preparabamos. O capricho desta volta veu dado pola cea do sábado no Gastrobar Los Leones de Viveiro, na que descubrimos con varias amizades algún petisco destes para recrear. E este foi o máis destacado. Hai combinacións que non fan sentido até que se xuntan no padal. Ollo con isto! :-) 

Tosta de solombo e queixo de cabra

Ingredientes:

• Pan
• Toros de solombo
• Un rulo de queixo de cabra
• 2 cebolas
• 2 culleradas de azucre
• 1 culerada de vinagre
• Aceite de oliva
• Especias ao gusto
• Pementa moída
• Sal
• Marmelada de tomate (opcional)

Utensilios: unha tixola, unha prancha, unha espátula e un prato.

Elaboración:

Para comezarmos, temos de facer a cebola caramelizada. Cortamos a cebola en xuliana e rustrímola, a lume moi baixo, en dúas culleradas de aceite e sazonada con pementa e sal até que abrande completamente e teña unha cor dourada, aproximadamente 30 min.

De seguir, agregamos o azucre e o vinagre e cociñamos 5 min máis. Reservamos.

Cortamos o pan en torros e torrámolo na prancha. Facemos o mesmo co queixo. Reservamos.

Por último, preparamos o solombo. Adobámolo coas especias que máis nos gustan e facémolo na prancha. Nós pasámolo moi ben, mais iso queda ao voso gusto.

E chegou a hora de montar a nosa tosta! Sobre o pan facemos unha cama de cebola.

Despois colocamos o solombo e o queixo.

Finalmente, un chisco de marmelada.

E xa estarían listas para comer!

Agardamos que vos gusten. De seguro que se vos animades a probar, non vai ser a única vez. Delicia ben sinxela. Xa nos contades. Aperta forte, bolboreteir@s!