Garavanzos con mexillóns

Bo martes, bolboreteir@s! Benvid@s a agosto, un dos meses máis interesantes do ano, sen dúbida, aínda que sexa só pola cantidade de festas que temos polo país adiante.

Aínda que nós estamos a uns cantos quilómetros de distancia, non nos esquecemos da nosa terra, e nela precisamente o clima permite degustar, aínda no verán, pratos como o que hoxe vos traemos. Algún/nha estará a tratarnos de tolos ao ver este prato para comezar agosto mais a verdade é que a nós, canto menos na Mariña, co clima tan suave que temos (como estamos a comprobar este verán), préstanos un prato contundente coma este sexa a época que for.

Xa tiñamos en mente desde hai tempo probar esta combinación de mexillóns e garavanzos e, aínda que nun principio iamos optar por facelo en modo ensalada, o día de néboa levounos a optar por algo máis potente e tamén máis intenso.

Evidentemente, para @s da zona de Ourense e Vigo, seguirá sen apetecer aínda moito mais deixamos este novo recurso gastronómico para anotardes e levardes á práctica sempre que vós quixerdes. Aquí fica!

Garavanzos con mexillóns

Ingredientes:

• 2 tazas de garavanzos 
• 300 g de mexillóns 
• 1 pemento vermello 
• 1 pemento verde 
• 1 tomate 
• 1 cebola 
• 2 dentes de allo 
• Pemento doce 
• Pemento picante 
• Pementa moída 
• 1 folla de loureiro 
• 1 chile
• Sal 
• 100 ml de viño 
• Aceite 
• Auga 

Utensilios: dúas potas, un coitelo e unha táboa e un batedor eléctrico (opcional).

Elaboración:

Para comezarmos, temos de deixar os garavanzos en remollo a noite anterior. Ao día seguinte, cocémolos en abundante auga con sal e a folla do loureiro.  Cando estean listos, reservamos.

Nunha pota, rustrimos en dúas culleradas de aceite o allo, o chile, a cebola, os pementos e os tomates. Salpementamos.

 

Cando abranden un pouco engadimos o viño e o pemento doce e o picante  e deixamos cociñar 10 minutos máis.

 

Pasado ese tempo, se queremos, podemos triturar a salsa.

Engadimos os mexillóns e cociñamos 5 minutos.

Agregamos os garavanzos cocidos e fervemos todo xunto durante 5-7 minutos.

Reservamos durante 10-15 minutos para que se asenten os sabores e sexa aínda máis delicioso!

E xa estaría listo para comer! Agardamos que vos guste e que probedes a facelo porque vos encantará 😉😉

Nas fotos xa podedes comprobar o apetecíbel deste prato mais resulta especialmente interesante esa combinación mar/terra encarnada nos mexillóns e garavanzos. Agardamos impacientes que nos contedes dos vosos resultados aínda que serán tan exitosos coma este, de seguro.

Unha fortísima aperta e tede boa entrada de mes!