Pizzas rápidas

Bo día, bolboreteir@s! Hoxe erguémonos con novas de Bolboretas no bandullo xa que algo falan na prensa de nós e dos nosos seguidores e seguidoras. Aí tedes o artigo Voz de Galicia que nos fai moitísima ilusión.

E a todo isto, nós seguimos con diferentes receitas que nos permitan saír de calquera apuro ou facer unha sabororísima cea en pouco tempo naquelas xornadas en que máis cans@s estamos. Non imos cambiar a pizza tradicional por nada do mundo, sobre todo porque é un dos nosos manxares de referencia, mais si é certo que precisa o seu tempo entre o lévedo da masa, a cocción e demais. Por iso, traémosvos unha solución máis apurada e de bo rendemento. Tres diferentes opcións de pizzas en que a base consiste nas tortillas mexicanas con que adoitamos facer as "fajitas" ou "burritos". Aínda que temos a receita das propias tortillas aquí, como consiste nunha receita rápida, xa aproveitamos as mercadas integrais.

Nós o que fixemos, foi probar diferentes combinacións para ver cal ficaba mellor. As tres encantáronnos. aínda que hai unha vencedora. Ollade para ver cal é a nosa preferida! 

Pizzas rápidas

Ingredientes:

Para a 1ª opción: de mexillóns

• 1 tortilla mexicana
• 3-4 culleradas de salsa de tomate
• Un chisco de ourego
• 1/2 bola de mozzarella
• 1 lata de mexillóns
• 7-8 olivas 

Para a 2ª opción: de queixo

• 1 tortilla mexicana
• 3-4 culleradas de salsa de tomate
• Un chisco de ourego
• 1/2 bola de mozzarella
• Queixo relado
• Queixo en lonchas

Para a 3ª opción: de coliflor

• 1 tortilla mexicana
• 3-4 culleradas de salsa de tomate
• Un chisco de ourego
• 1/2 bola de mozzarella
• 60-70 gr de coliflor
• 2-3 espárragos
• 2-3 champiñóns

Utensilios: relador ou mandolina, unha culler, papel vexetal e unha bandexa de forno.

Elaboración: 

Para comezarmos, temos que cubrir as bandexas de forno con papel vexetal e colocar as tortillas mexicanas. Nós, neste caso, utilizamos tortillas integrais que mercamos mais deixámosvos aquí a receita por se vos apetece facelas na casa. 

A continuación, estendemos a salsa de tomate (ou salsa barbacoa ou a que máis vos guste) e empoamos cun chisco de ourego. 

De seguir, facemos as pizzas cos ingredientes que escollimos. Primeiro botamos o queixo, a mozzarella ou o relado. 

Despois, para a primeira opción, os mexillóns e as olivas, cortadas á metade. Se vos animades, probade a botar un chisco, moi chischo, do mollo que vén cos mexillóns, veredes que lle dá un toque sorprendente.

Para a segunda opción, botamos os queixos ao noso gusto: mozzarella, o queixo relado e en lascas.

E, para última opción, relamos a coliflor, cortamos en lascas os champiñóns e cortamos en anacos os espárragos. 

Enfornamos a 200º, calor arriba e abaixo, durante, aproximadamente 15 minutos, ou até que vexamos que as tortillas están douradas e o queixo fundido. 

Como vedes, son 3 opcións moi sinxelas que se fan nun momento. Ademais, o tempo que as temos no forno podemos aproveitar para adiantar outros traballos ou descansar un momento. 

Máis sinxelo imposíbel. E tedes clara cal será a opción que máis vos pracerá? Nós levamos unha sorpresa descubríndomos o toque fino e suave que lle dá a coliflor. Desde logo que esa pizza foi o descubrimento do día. Agora probaremos o resultado desta verdura con masa normal, mais todo apunta a delicia máxima!

Iso si, estas pizzas entran a toda velocidade e non vos estrañedes que logo desaparezan do prato xa que son moito máis lixeiras. Agardamos que vos gusten moitísimo! Unha forte aperta, bolboreteir@s!