Boliños integrais de allo e mozzarella

Xa fin de semana! Tardaba, verdade?? Para nós esta foi unha semana moi boa así que tampouco tiñamos moita présa por que remara, mais si é verdade que sempre agardamos impacientemente polo sábado para vos traer unha nova receita. E hoxe toca unha nova larpeirada, non por doce, senón porque cremos que só con maxinala, xa se nos fai a boca auga...

Vimos hai tempo en Youtube unha receita en inglés similar a esta e decicimos preparala xa que existe algo mellor que eses produtos que gardan un centro de queixo que se derrete na nosa boca ao meterlle o dente? E si, nesta receita, o queixo obtén o protagonismo, aínda que se acompaña moi ben dunha masa integral e toque allado, que sempre se fai imprescindíbel.

Que tal os vedes para acompañar un pouquiño de pasta? Mmmmm...

Boliños integrais de allo e mozzarella

Ingredientes (para 20 boliños):

Para a masa:

• 300 gr de fariña integral
• 200 ml de buttermilk 
• 70 gr de manteiga
• 1 cullerada de allo en po
• 1 culleriña de cebola en po
• 1 culleriña de lévedo en po
• Un chisco de azucre
• Un chisco de sal

Para o recheo:

• Unha bóla de mozzarella

Para pintar os boliños:

• 30 gr de manteiga
• 1 dente de allo
• 1 culleriña de ourego
• Un chisco de sal

Utensilios: unha cunca grande, un vaso, un garfo, papel vexetal, papel transparente, un coitelo, un cazo e un pincel.

Elaboración:

Para comerzarmos temos de preparar o buttermilk, se é que non o encontramos no mercado. Para iso, botámoslle a 200 ml de leite, unha cullerada de zume de limón, mesturamos ben e deixamos repousar 10 min para que espese un pouco; e xa estaría listo. 

A continuación, mesturamos a fariña, o azucre, o sal, o allo e a cebola. 

Removemos ben e engadimos a manteiga. 

Agregamos o buttermilk e mesturamos moi ben coa axuda das mans até obter unha masa homoxénea. 

Envolvémola con papel transparente ou metémola nunha bolsiña de plástico e refrixeramos durante 10-15 minutos. 

Estiramos a masa coa axuda dun rolete. 

Cortámola en cadradiño, máis ou menos iguais, e colocamos, sobre cada un, un anaco de mozzarella. 

Tapamos a mozzarella e, coa axuda das mans, facemos pequenas boliñas tentando que queden ben seladas para que no forno fuxa o menos queixo posíbel.

Forneamos a 200º, calor arriba e abaixo, durante 18 minutos. Non vos preocupedes se se escapa algo de queixo, xa que é normal. 

Mentres se temperan un pouco, preparamos o "glaseado" para pintalos. Botamos nun cazo a manteiga, o ourego, o allo moi picadiño e o sal. 

Quentamos até que se funda toda a manteiga. 

Coa axuda dun pincel, pintamos os boliños. 

E xa estarían preparados para comer!! Pódense tomar tanto quentes coma fríos, estarán deliciosos das dúas formas ;) 

Nós, que somos un pouquiño lambóns, collimos unha bolsiña e fomos para o cinema con estas delicias. Non sabedes canto mellor non se ve así un filme, haha. E iso que nós somos moitísimo de flocos de millo, mais isto é outro nivel, hehe.

Xa sabedes, cando hai receitas tan saborosas, pódenselle dar mil e un usos. Esta queda desde xa nas vosas mans. Pasade unha fin de semana inmellorábel. Unha fortísima aperta, amig@s!