venres, 5 de setembro de 2014

"Fajitas" mexicanas

Nova receita lectores e lectoras!! Hoxe imos cunha receita chegada da América e que está alcanzando moitísimo éxito nos últimos anos por Europa, a fajita mexicana, un prato xenial para saír do apuro ante calquera visita inesperada. Parece que a súa orixe está nos vaqueros mexicanos que traballan en Texas e que recibían boa parte do seu salario en carne de vaca polo que procuraron un prato en que aproveitala da mellor maneira. Sexa como for, a nosa fajita leva polo xa que esta é a forma máis común de degustala hoxe en día. Ou polo menos a que a nós máis nos gusta :-)


Fajitas mexicanas

Ingredientes (para 2 fajitas):
  • 2 tortillas mexicanas
  • 1 filete de peituga
  • 1/2 pemento vermello
  • 1/2 pemento verde
  • 1/2 cebola
  • 1/2 sobre de preparado para fajitas
  • Aceite de oliva
  • Queixo relado (opcional)


Elaboración:

Para comezar, temos que picar en xuliana (tiras finas) a peituga, os pementos e a cebola. Botamos nunha tixola dúas culleradas de aceite e engadimos a cebola. Cando abrande un pouco, agregamos os pementos. 










Cando as verduras estean feitas, botamos a peituga e deixamos que se fagan. Despois, engadimos o preparado para fajitas, mesturamos ben e cociñamos a lume medio durante, aproximadamente, 7 minutos. 










Mentres se remata de facer o recheo, quentamos as tortillas nunha prancha. Colocamos a tortilla no prato e botamos a metade do recheo e o queixo relado, envolvémolo con coidado e pechamos coa axuda dun escarvadentes. 








E xa teríamos as fajitas listas para comer! Esperamos que vos gusten e que aproveiten! 


Estamos seguros que este prato vos encanta e resulta do máis cómodo para preparar un xantar ou cea rapidamente. Desta volta nós optamos polas tortillas xa feitas, mais témolas feito tamén caseiras, que aínda están máis ricas, mais iso si, terá que ser para comidas cun pouco máis de tempo. Habémosvos traer a receita dentro de pouco. Mentres tanto podedes ir probando este delicioso prato que nos leva ao norte de México. Coa gastronomía tamén se viaxa :-)

Ningún comentario:

Publicar un comentario