Muffins de chocolate

Despois duns días con isto algo parado debido aos últimos exames dos rapaces e rapazas, volvemos hoxe cunha moi boa receita, muffins de chocolate, unha outra alternativa ás madalenas tradicionais. É certo, que nos estamos deixando levar un pouco polos anglicismos que inundan a respostaría, mais a verdade é que nós procuramos notar ou marcar algún punto de diferenza a través dos produtos traballados. Nesta ocasión, a chave está no toque a chocolate a través de pequenos cachiños que fan destes muffins un produto ideal para o almorzo ou a merenda.

Muffins de chocolate

Ingredientes:

• 160 gr de fariña
• 90 ml de leite
• 90 gr de chocolate con leite  
• 75 gr de chocolate con leite (para fundir)
• 65 gr de manteiga
• 60 gr de azucre moreno
• 1 ovo
• 1 culleriña de lévedo
• 1 culleriña de bicarbonato
• 1 culleriña de esencia de vainilla
• 1 culleriña de zume de limón

Elaboración: 

Para comezarmos, temos de mesturar o leite co zume do limón e deixalo repousar mentres mesturamos o resto dos ingredientes. 

De seguir, fundimos o chocolate coa manteiga ao baño maría. Engadimos o azucre e mesturamos ben. 

A continuación, engadimos o ovo, o leite e a fariña mesturada co lévedo e o bicarbonato.  

Finalmente, engadimos o chocolate cortado en anaquiños e repartimos a masa nas cápsulas. 

Enfornamos a 180º, calor abaixo e ventilador, durante 25 minutos, aproximadamente, deixamos que arrefríen un pouco e listos para comer!

Saíron perfectos e resultaron ser bastante farturentos así que non procuredes facer moitos xa que un por persoa, en principio, debería chegar dabondo. E xa sabedes, esta é unha idea para os elaborardes, mais despois podedes darlle o voso toque engadindo o sabor que máis vos guste: amorodos, plátanos, chocolate branco... É unha cuestión de lle pór imaxinación e desfutar facéndoos. Bo martes e desfrutade deste doce tan saboroso larpeir@s! ;-)