Cookies

Despois de probarmos varias receitas para elaborar estas deliciosas galletas con pebidas de chocolate, coa que mellor resultado obtivemos é con esta que hoxe vos presentamos, é do libro As lambetadas de larpeiros, aínda que nós fixemos algunha modificación. Son unhas galletas sinxelas que desde xa hai un tempo se están a converter nun clásico.  Parece que a súa creación orixinaria se produciu accidentalmente nun restaurante dos EUA de comida tradicional, coa integración casual do chocolate nas galletas.

A verdade é que con moi pouco esforzo podemos lograr unhas bolachas realmente deliciosas; esas pebidas danlle un sabor realmente intenso. Aí vos vai:

Cookies

Ingredientes (para unhas 18 unidades grandes):

• 185 gr de fariña
• 165 gr de azucre moreno
• 140 gr de chocolate negro con améndoas
• 80 gr manteiga
• 1 ovo
• 1 culleriña de vainilla
• 1/2 culleriña de bicarbonato
• Un chisco de sal

Elaboración:

Para comezarmos, mesturamos a fariña peneirada, o azucre, o bicarbonato e o sal e engadímoslles o ovo ben batido. 

De seguir, agregamos a manteiga e, coa axuda das mans, mesturamos ben. Despois, engadimos o chocolate cortado en anaquiños. 

A continuación, formamos boliñas sobre a bandexa de forno, cuberta con papel vexetal e enfornamos a 180º, calor arriba e abaixo co ventilador, durante 13 minutos, aproximadamente (o tempo de cocción vai variar segundo o tamaño das bolachas, máis temos de calcular entre 10 e 15 minutos).  

Deixamos arrefriar e listas para comer!! 

Se non sabedes que sobremesa ou merenda elaborar e queredes ir ao seguro, esta é unha das mellores opcións debido á súa sinxeleza e ao seu sabor exquisito. E se tedes pequen@s pola casa... tolearán con estas cookies. Unha delicia que debedes probar a facer. Bo domingo larpeiriñ@s ;-)