Pan de trigo

O pan, descuberto en Oriente Próximo no 8000 a.C, constitúe a base da alimentación da pirámide alimenticia e foi o elemento nutricional básico de moitas culturas e por suposto da Galiza que, por falta de medios para outros produtos, recorreu historicamente ao pan, especialmente ao de millo, para remediar a fame. Actualmente segue a estar case a diario nas nosas casas aínda que máis ben como acompañante aínda que, para nós, segue a ser imprescindíbel polo seu sabor, sobre todo se optamos por facelo na casa como neste caso. 

É unha receita que precisa dun certo tempo pola fermentación da masa, mais resulta totalmente sinxela de elaborar e daravos para varias comidas, ben gardándoo nun bo lugar para a súa conservación ou mesmo conxelándoo para recorrer a el cando non teñades na casa. Supoño que moit@s de vós hoxe en día non disporedes das tradicionais artesas, que aguantaban o pan máis dunha semana, mais aínda así, pode durarvos con bo sabor uns cantos días. Sexa como for, recoméndovos que unha vez polo menos probedes a facer pan nos vosos fogares.

Pan de trigo artesán

Ingredientes:

• 2 vasos de fariña de forza
• 1 vaso de fariña de trigo
• 1 vaso e medio de auga tibia
• 25 gr de lévedo
• 1 culleriña de sal
• O zume de medio limón
• Bagas de goji, opcionalmente

Elaboración:

Botamos todos os ingredientes nunha cunca e remexemos coa axuda dunha culler ou dunha espátula até que estean integrados; non é preciso remover moito tempo. 

Agora, temos que deixar reposar a masa durante unha hora ou hora e media, até que duplique o seu tamaño, preferibelmente nun lugar non moi frío.

Pasado ese tempo, enfariñamos unha superfice lisa e baleiramos alí a nosa masa botándomoslle máis fariña por riba; amasamos un pouco e dámoslle a forma que quixermos. 

De novo, temos de deixar reposar arredor de media hora, podemos rodear a masa cun pano para que suba e non se expanda cara aos lados. Como podedes comprobar, nós fixemos dúas bolas, unha con bagas e outra sen elas para probar diferentes opcións.

De seguir, enfornamos (calor abaixo) a 200º durante 40 minutos. Deixamos que arrefríe un pouco e a comer!! Notaredes a textura e espesura da rafa, ben diferente da mercada, e comprobaredes tamén como é moito máis fartureiro.

Quen tiver a oportunidade de mercar a fariña nun deses poucos muíños que seguen dispoñíbeis poderá lograr un pan aínda máis tradicional e cun sabor máis intenso. E xa non digamos se dispoñedes dun forno de pedra, ñam!

Proba da importancia que tivo o pan na Galiza e que fixo parte de moitos textos dos nosos escritores e escritoras. Non a este pan, mais Otero Pedrayo, por exemplo, escribiu o poema titulado "Pan de centeo". Déixovos para acompañardes esta bola uns fermosos versos de Rosalía do poema de Follas novas, "¡A probiña que está xorda...!" en que tamén alude a este alimento tradicional:

¡Coma e fártese! aquí ten

talladas e viño...; beba,

beba pola miña conta

á salú das montañesas.

—Dixo a dona, e doulle un prato

De callos como unha cesta

Á probe, e viño e pan branco,

Canto quixo; fartouse ela

Mesmo hastra que tuvo a tripa

Coma un pandeiro. Rabenta

Por pouco...; mais o pelexo

Tiña duro, e nin siquera

Lle arregañou, i ó outro día

Xa estaba tan peneireira.

Para @s amantes do pan recoméndovos seguirdes a Asociación Cultural Con Moita Miga, que traballa na defensa, divulgación e promoción do pan galego. Precisamente esta finde organizan en Compostela unhas interesantísimas xornadas dedicadas ao noso pan http://conmoitamiga.org

Para a próxima probamos co pan de broa ;-)