A pasta máis famosa de TikTok (con tomatiños e queixo)

Boa noite, bolboreteir@s. Como vai?? Por aquí tivemos unha fin de semana de relax e gastronomía. O sábado pasamos pola mítica feira de Betanzos para almorzar uns churros e petiscar despois algo e hoxe tocou tailandés e xeado nesta tarde solleira.

E claro, argallamos tamén algunha cousiña para o blogue. Hoxe traémosvos unha receita que se tornou viral na rede social de moda, o Tiktok e que nos vimos obrigados a probar. Xa sabedes, nós caemos en calquera reto gastronómica que haxa pola rede, sobre todo se implica unha proba despois. 

É certo que nós aínda non estamos nesa rede (todo caerá) mais si chegou a nós a través doutras e a verdade é que nos chamou moito a atención pola sinxeleza e bo aspecto. Imos por ela!

A pasta máis famosa de TikTok (con tomatiños e queixo)

Ingredientes:

• Macarróns
• 300 g de tomatiños cereixas
• 1 taco de queixo feta
• Ourego
• Pementa moída
• Sal
• Aceite de oliva 
• Auga

Utensilios: unha pota, unha fonte apta para o forno e unha cunca. 

Elaboración:

Para comezarmos, poñemos o queixo no centro da fonte, ao redor, os tomatiños. Botamos pementa, sal e o ourego ao noso gusto. 

Tamén, botamos un pouco de aceite de oliva. 

Enfornamos a 200º, calor arriba e abaixo, durante 30 minutos. 

Mentres tanto, cocemos a pasta que máis nos guste. 

Sacamos os tomatiños e o queixo do forno e mesturamos moi ben. 

Engadímoslle a mestura á pasta e remexemos moi ben. 

Decoramos con alfábega e xa estaría lista para comer!

Agardamos que vos guste! Xa nos diredes se caedes vós tamén na tentación. Lémonos proximamente, amig@s!!