Caracolas de allo

Bo domingo, bolboreteir@s. Como estades? Nesta ponte das Letras galegas a verdade é que non nos está quedando tempo para moita cousa entre correccións e correccións así que hoxe presentamos un petisco rápido para ese tipo de xornadas máis atarefadas. 

Xa sabedes que con follado pódense facer mil e unha marabillas simples e no noso frigo ou conxelador nunca falta. É certo que a nós gústanos moito o seu sabor, aínda que for sen nada máis, pero recomendamos igualmente para calquera persoa telo sempre á man porque dá para improvisar receitas moi diversas.

Na receita que aquí segue vai lograr o protagonismo o allo. Os boliños allados, as masas aromatizadas con allo... son éxito seguro e aquí temos unha nova mostra. A textura tradicional do follado, a intensidade do ingrediente principal levan a un petisco do máis agradábel. A por el!

Caracolas de allo

Ingredientes:

• 1 lámina de follado
• 4-5 dentes de allo
• 2 culleradas de manteiga
• 3-4 culleradas de aceite
• Herbas aromáticas
• Sal

Utensilios: unha cunca, unha culler, un picador de allo (ou táboa e coitelo), un coitelo e unha bandexa de forno con papel vexetal.

Elaboración:

Para comezarmos, temos de picar o allo finamente. É importante non deixar anacos demasiado grandes que nos poden amargar a caracola. 

Engadimos a manteiga a temperatura ambiente.

Agregamos o aceite.

O chisco de sal e as herbas aromáticas, as que máis vos gusten.

Estiramos o follado e pintámolo con esta mestura.

Cortámolo en tiras.

Enrolamos, primeiro, sobre si mesmos, e, despois, dando forma de caracolas.

Enfornamos a 200º, calor arriba e abaixo, até que estean douradas, aproximadamente 12 minutos. 

E xa estarían listas para comer! Adoramos este tipo de creacións con tan pouco traballo e tan bo resultado. Xa nos mostraredes a vosa posta en práctica. Aperta, amig@s!