Pasta con brócoli

Bo día, bolboreteir@s! Despois deses berberechiños saborosos desta semana, metémonos na rutina blogueira para vos traer un recurso para o día a día. En todas as casas temos a pasta preparada para tirar dela unha ou dúas veces á semana así que, como dicimos sempre para este tipo de recursos frecuentes, nós recomendamos varias posibilidades a ter en conta. 

E pasta hai moitas formas de a papar para nos quedar unicamente coa pasta con tomate ou pasta bolognesa. A de hoxe havos de interesar moito, especialmente ás persoas amantes das verduras ou tamén ás que queredes integralas na vosa alimentación ou na dos peques. 

Fixádevos pois en como aquí entra o brócoli facendo atractivo, colorido e sobre todo moi saboroso o prato. 

Pasta con brócoli 

Ingredientes:

• 400 g da pasta que vos guste 
• 1 brócoli
• O zume dun limón 
• 2-3 champiñóns       
• 2-3 dentes de allo
• 1 chile 
• Pementa moída
• Sal
• Aceite de oliva 

Utensilios: unha pota, unha tixola, unha picadora e unha culler.

Elaboración: 

Para comezarmos, temos de cocer a pasta segundo nos indique o paquete. Mentres tanto, lavamos e picamos o brócoli.

Reservamos.

Rustrimos os dentes de allo e o chile en dúas culleradas de aceite. 

Cando empece a dourar, botamos o brócoli. Cociñamos 5 min.

Botamos o zume de limón e cociñamos 5 min máis.

Agregamos os champis laminado e deixamos que se fagan. 

Agregamos a pasta e mesturamos moi ben. Aquí é posíbel que teñamos que agregar un pouco máis de aceite.  Empoamos co queixo e xa estaría lista para comer!

Agardamos que vos guste e que mañá pasedes xa polo super para coller o voso brócoli. Nós somos uns tolos desta verdura e papámola de mil e unha formas mais a verdade é que nesta versión deixounos abraiados. Agardando desde xa as vosas impresións. Forte aperta, bolboreteir@s!!!