Berberechos en salsa

Di a cantiga: onde vas, meu queridiño? / Onde vas, meu caravel? / Vou buscar berberechiños / para darlle ó meu querer." Pois claro, tremenda ofrenda amorosa. A quen non has de conquistar cunha boa presada de berberechos?

Nós tivemos a sorte de contar cunha boa cantidade deles nesta semana pasada e logo aproveitamos para lles facer festa. Procuramos unha salsa para lles intensificar o sabor et... voilá! Tremenda gozada de receita. Ademais, nesta casa, sempre que hai marisco en salsa, sabemos que despois toca sopa derivada da mesma. E xa non sabemos que é mellor, se un se outro.

Por certo, despois desta receita, recuperaremos a rutina de publicacións. Neste Nadal xa aproveitamos para adiantar cousiñas que vos iremos traendo progresivamente. Aquí vai a primeira do ano!

Berberechos en salsa

Ingredientes:

• 2 kg de berberechos 
• 1 l de caldo de peixe
• 400 ml de viño branco
• 2 cebolas     
• 3-4 dentes de allo
• Pirixel
• 2 culleradas de fariña 
• Pementa doce
• Pementa picante
• Chile
• Pementa moída 
• Sal
• Aceite de oliva 

Utensilios: unha pota, unha tixola, un coador, unha táboa e un coitelo e unha culler.

Elaboración:

Para comezarmos, temos que rustrir os dentes de allo e o chile, ben picados, en 2-3 culleradas de aceite.

Cando empecen a dourarse, botamos as cebolas e o pirixel, moi picados tamén. Usamos unha cebola morada, de aí esa cor. 

Deixamos que se cociñen ben. Agregamos 250 ml de viño e deixamos ferver 2-3 min.

Botamos a fariña e remexemos até que se integre.

Engadimos o caldo e cociñamos 10 min. 

Noutra tixola, quentamos o resto do viño e imos abrindo os berberechos. 

Segundo vaian abrindo, incorporámolos á salsa. Cando rematemos de abrir os berberechos, coamos líquido que queda e agregámolo á salsa. 

Botamos as pementas e o sal e probamos. Cociñamos 5 min máis.

E xa estarían listos para comer!

Agardamos que vos guste e que poñades en práctica a receita para logrardes un manxar espectacular. Esta é a nosa entrada de ano gastronómica. Sede moi felices, bolboreteir@s!