sábado, 1 de febreiro de 2020

Migas manchegas á nosa maneira

Bo día, bolboreteir@s! Como vai todo? Hoxe traemos unha receita diferente e case que estraña no noso blogue pois non adoitamos preparar moitos pratos da meseta peninsular. Porén, había tempo que tiñamos ganas de preparar unhas migas, que a verdade, gústannos moito.
Así pois, invesetigando un pouco pola rede, comprobamos que hai diferentes versións pero a da Mancha é unha das máis famosas (e tamén máis contundente). Vendo que gustabamos de case todos os ingredientes, pensamos que esta era a nosa! Iso si, adaptámolo ao noso xeito.
Esteticamente non é o prato máis fermoso do mundo mais xa sabedes que o importante está no sabor. E niso este prato vai moi sobrado como poderedes comprobar. Imos por el!






Migas manchegas



Ingredientes:


  • 1 barra de pan do día anterior
  • 300 g de zorza
  • 8-10 lascas de bacon
  • 2 dentes de allo
  • Auga
  • Aceite de oliva


Utensilios: unha fonte, unha tixola, un coitelo e unha culler.



Elaboración:


Para comezarmos, temos que desmiuzar o pan coas mans. 


Botámoslle 1/2 vaso de auga para humedecelo. Remexemos moi ben e deixamos repousar 2 h. De cada pouco, dámoslle unhas voltas e, se vemos que se absorve toda a auga, engadimos unha pouca máis. Reservamos. 


 Cortamos o bacon en tiras e rustrímolo nunha tixola, sen aceite.


Cando empece a dourar, agregamos a zorza e fritimos até que ambos estean cociñados. Reservamos. 



Nesa mesma tixola, agregamos 2 culleradas de aceite e botamos os dentes de allo, ben picados. Cando teñan algo de cor, agregamos as migas de pan. 



Cociñámolas até que estean ben douradiñas. 


Nese momento, agregamos a zorza e o bacon e mesturamos moi ben. 


Cociñamos un par de minutos todo xunto e xa estarían listas para comer! 


Agardamos que vos gusten e que poñades esta receita en práctica. Aínda que sexa por darlle unha segunda vida ao pan do día anterior. Por certo, canto nos gustan estes pratos de aproveitamento e a verdade é que en Galiza temos moitos, e varios que xiran arredor do pan. Lémonos, amig@s. Aperta forte!!


2 comentarios:

  1. Ains mira que soy antojitos ,es ver estas migas y antojarseme ya uuuuumm seguro que están de rexupete 😋
    Como siempre receta y fotos son de 20 points.
    Bicos mil para los tres wap@s 😘

    ResponderEliminar
    Respostas
    1. Siii! As migas son espectaculares! Desde que as probamos en Granada... son un vicio!
      Bicos!

      Eliminar