Rigatoni ao forno

Sábado de receita! Hoxe traemos un novo prato para @s que gustades da pasta, que debemos ser a grande maioría da poboación. Destas sempre tentamos acumular varias pois este tipo de pratos son económicos e moi válidos para a rutina. 

Aínda que habitualmente traballamos máis coa pasta pasada pola tixola despois da cocción, desta volta tocou forno e ficamos moi satisfeitos.

Escollemos os rigatoni para variar pois aquí tiramos máis no día a día ao spaguetti tradicional ou aos macarróns mais a verdade é que practicamente todos estes pratos se poden intercambiar pois case todas as pastas recollen moi ben o sabor das salsas. Velaquí está?

Rigatoni ao forno

Ingredientes:

• 750 ml de caldo de verduras
• 400 g de macarrón (tipo rigatoni)
• 400 g de tomate ao natural
• 1 cebola
• 2 dentes de allo
• 1 bóla de mozzarella
• Pementa moída
• Alfábega
• Sal
• Aceite de oliva

Utensilios: unha tixola, unha fonte apta para o forno, unha culler e unha táboa e un coitelo.

Elaboración:

Para comezarmos, temos de rustrir a cebola ben picadiña en dúas culleradas de aceite.

Cando empece a abrandar, rustrimos nun lado da tixola os dentes de allo, tamén ben picados.

Agregamos os tomates e, coa axuda da culler, desfacémolos na tixola. 

Sazonamos ao noso gusto coa pementa moída, a alfábega e o sal. Cociñamos 15 minutos. 

Botamos a salsa no recipiente apto para o forno. 

Engadimos os macarróns. 

Agregamos o caldo, ben quentiño, sobre a pasta. Enfornamos a 200º, calor arriba e abaixo, durante 30 minutos, ou até que pasta estea no seu punto. 

Cando a saquemos do forno, agregamos o queixo, cortado en anacos, e empoamos con máis alfábega. 

E xa estaría lista para comer! 

Babexando xa? Pois non hai máis que seguir as pautas e recrear o prato nas vosas cociñas. Veredes que ben. Aperta forte, bolboreteir@s!