Galletas de cacahuete

Bo día, bolboreteir@s! Como andades? Por aquí moi contentos pois estas semanas próximas imos ter moitas novidades en Bolboretas no bandullo e andamos metidos de cheo argallando nelas.

Seguro que algúns e algunhas de vós andaredes xa dicindo ao ver a receita: que tipos, aínda aguantaron sen lambetadas despois do Nadal! Pois ben certo, a verdade é que nos leva a vida. Sexa por unha cousa ou outra. Aínda que desta vez tiñamos boa excusa. Unha amiga convidounos a coñecer a súa nova casa e claro, xa sabedes, algo doce sempre se levou ;-)

Así pois, desde que nos regalaron o libro de Las mejores recetas de Dulce sentimiento de Mirta Escudero tiñamos en mente esta receita coa crema de cacahuete como protagonista e non o pensamos un momento. Aquí están!

Galletas de cacahuete

Ingredientes:

• 230 g de fariña
• 150 g de crema de cacahuete
• 120 g de azucre
• 100 g de manteiga
• 1 ovo
• Cacahuetes recubertos de chocolate

Utensilios: unha cunha, un batedor manual (ou eléctrico), unha bandexa de forno e papel vexetal.

Elaboración:

Para comezarmos, temos de mesturar o azucre coa manteiga.

Agregamos a crema de cacahuete.

Cando estea ben integrada, botamos o ovo batido.

Engadimos a fariña, pouco a pouco, até ter unha masa homoxénea.

Por último, agregamos as boliñas de cacahuete. Nós escollémolas de chocolate negro, con leite e branco.

Facemos boliñas (nós fixémolas algo gordiñas, mais podédelas facer máis finas) e poñémolas nunha bandexa de forno cuberta con papel vexetal.

Enfornamos a 180º, calor arriba e abaixo, durante 15 min. Porén, se as facedes máis finas, restade 2-3 minutos. Deixamos que arrefríen e xa estarían listas para comer!

Mandariavos confirmalo coas comensais xa que elas serían quen mellor vos poderían confirmar o que se intúe xa nesta receita. O caso é que para a casa non volveu ningunha, voaron! E con razón, estaban deliciosas. Agardamos que gustedes, amig@s! Aperta forte!