Spanakopita

Bo día, bolboreteir@s!! Como levades a fin de semana? Nós xa un pouco cansos de temporais e choiva. Está ben que é o que corresponde mais non dan un respiro para pasear. Iso si, estamos acumulando receitas como nunca. Dannos as xornadas (alén de coidar, mimar e mirar para o peque) para ler, descubrir e probar novas receitas como a que hoxe vos traemos.

O spanakopita, nome ben curioso, provén de Grecia e consiste nunha torta de espinacas e queixo feta tendo como base esa masa filo que tanto nos sorprende cada vez que a degustamos. Fálase das influencias turcas no prato e tamén da orixe humilde, ligada aos pastores, de aí a utilización de produtos económicos.

Sexa como for, pareceunos unha idea ben interesante para nos achegar unha vez máis á gastronomía mediterránea. Aquí vai.

Spanakopita

Ingredientes:

• Varias láminas de masa filo
• 300 g de espinacas
• 100 g de queixo feta
• 1 cebola
• 2 dentes de allo
• 1 culleradas de manteiga
• Eneldo
• Pementa moída
• Sal 
• Aceite de oliva

Utensilios: unha tixola, unha bandexa apta para o forno, papel vexetal, un molde redondo apto para o forno e un coitelo. 

Elaboración:

Para comezarmos, temos de botar a manteiga na tixola e derretela, engadimos os dentes de allo ben picadiños. 

Cando o allo empece a ter cor, agregamos a cebola, tamén ben picadiña. Cociñamos sobre 7 minutos. 

Agregamos as espinacas. Salpementamos ao noso gusto e botamos un chisco de eneldo. Cociñamos 5 minutos e reservamos.

Mentres tanto, collemos 5-6 láminas de pasta filo, pintámolas con aceite e colocámolas sobre o molde que imos usar. 

Botamos o recheo de espinacas e cebola e tamén agregamos o queixo.

Pintamos outras 5-6 láminas de pasta filo e cubrimos con elas o recheo. Coa masa sobrante, facemos os bordos. 

Coa axuda dun coitelo, sen calcar moito, debuxamos as porcións da torta. De seguir, pintamos a superficie con auga.

Enfornamos a 190º, calor arriba e abaixo, durante 25 minutos. 

E xa teriamos a nosa torta salgada lista para comer!

Agardamos que vos guste! Está claro que non nos as nosas empanadas mais iso xa é outra liga (tamén a elaboración é máis consistente). Con todo, é unha idea moi interesante para ampliar os nosos menús e darlle máis posibilidades ao noso padal. Agardamos que gustedes. Forte aperta, amig@s!