Filloas de espinacas recheas

Boas, bolboreteir@s! Filloas en agosto? por favor, non vos asustedes que non imos mostrar a nosa obsesión coa repostaría de Entroido nestes días, mais vimos sempre reivindicando o papel das filloas salgadas para a configuración de receitas exquisitas, nun chanzo superior a aquelas receitas nas que se utilizan pans como tortitas e demais.
Desta volta escollemos unha filloas moi coloridas grazas a esta verdura que asociamos tradicionalmente a aquel querido Popeye da nosa infancia. Ademais, é unha das nosas verduras de referencia para o cociñado debido ao seu sabor suave e á adaptabilidade que ofrecen. Desta volta, aparecen tamén con esa suavidade que se deixa levar por un recheo clásico, dos que non fallan. Aí vai!

Filloas de espinacas recheas

Ingredientes:

Para as filloas:

• 250 g de espinacas
• 100 g de fariña integral
• 5 culleradas de leite
• 1 iogur natural
• 1 ovo
• Noz moscada
• Pementa moída
• Sal

Para o recheo:

• 10-12 champiñóns
• Unhas lascas de xamón
• 1 cebola pequena
• 1-2 dentes de allo
• 1-2 ovos (opcional)
• Queixo relado (opcional)
• Aceite

Utensilios: dúas cuncas, un batedor eléctrico e un manual, unha tixola e unha tapa.

Elaboración:

Para comezarmos, temos de triturar as espinacas. Se utilizades espinacas frescas, é probábel que teñades que engadir un chisco de auga para bater mellor. Reservamos.

Noutra cunca, batemos o ovo, o leite, o iogur e as especias ao gusto. 

Mesturamos coas espinacas trituradas.

Agregamos, pouco a pouco, a fariña. Reservamos 25-30 minutos.

Mentres tanto, rustrimos os dentes de allo e a cebola ben picadiños en dúas culleradas de aceite. 

Botamos os champiñóns laminados.

Cando estean ben cociñados, agregamos o xamón, cortado en cadradiños e mesturamos moi ben. 

Xa poderiamos deixar así o recheo mais, se vos gusta, podedes engadir un par de ovos e facer un revolto. Reservamos. 

Nunha tixola, engrasada cun chisco de aceite, imos facendo as nosas filloas. Botamos unha pouca cantidade e estendémola moi ben pola tixola. Cociñamos sobre 2 minutos por cada lado. A nós para darlles a volta foinos moi útil a tapa dunha tixola, porque cos dedos a masa rompía un pouco. Así que teredes que probar que é o máis sinxelo para vós ;)

Reenchemos co salteado ou revolto, opcionalmente tamén podedes engadir un chisco de queixo. 

E xa estarían listas para comer! Que aproveite!

Aquí papámolas ao xantar de maneira case que vampiresco, metendo o dente cada volta con máis ansia. Ficades así cunha idea que se pode adaptar aos vosos gustos e que vos dará moi bo proveito. Forte aperta, bolboreteir@s!