martes, 11 de xuño de 2019

Olivas recheas

Bo día, bolboreteir@s! Andamos dando os últimos arreóns do curso, corrixindo exames, calculando medias, pensando na despedida co alumnado... e así queda pouco tempo para a cociña mais como sempre dicimos, comer hai que comer. E máis vale!
Hoxe presentámosvos un petisco sinxeliño, coas olivas como protagonistas aínda que desde unha outra perspectiva. O froito da oliveira é un clásico nos entrantes dos menús festivos de igual maneira que o friame. Con todo, é raro vermos as olivas cociñadas dalgunha forma no menú. Pensámolo e como nós gustamos bastante desta froito, pois decidimos probar a ver que saía. E como ides ver, isto non pinta mal, hehe. Por certo, sabedes que aínda que chegaron a través da cultura grega e mediterránea, as olivas tiveron bastante presenza no pasado na nosa terra. Pensade só a chea de antropónimos e topónimos como Oliveira ou Olveira. Por sorte, desde hai uns cinco anos estanse comezando a recuperar, especialmente por terras de Ourense. De aí os excelentes aceites galegos cos que contamos na actualidade.
Imos alá!




Olivas recheas


Ingredientes:

  • Olivas sen óso
  • Queixo feta
  • Fariña
  • 1 ovo batido
  • Pan relado
  • Pementa moída
  • Allo en po
  • Ourego
  • Aceite de oliva



Utensilios: varias cuncas, un garfo, unha tixola e papel absorbente.


Elaboración:


Para comezarmos, temos de escoar e secar ben as olivas.


Coa axuda dun garfo, trituramos un pouco o queixo.


Imos reenchendo as olivas co queixo, o máis sinxelo é facelo coas mans.









Secámolas, e limpámolas, ben co papel absorbente.


Mesturamos a fariña coa pementa moída, o ourego e allo ao gusto.


Pasamos as olivas pola fariña, o ovo batido e o pan relado.










Rustrímolas en aceite quente, aproximadamente 2 minutos cada unha.


Pasámolas a un prato cuberto con papel absorbente.E xa estarían listas para comer! 


Agardamos que vos gusten. Prato humilde e sinxeliño como vedes mais que serve para ofrecer unha alternativa entre os nosos petiscos e un toque de modernidade e, como non, sabor! Agardamos que vos prazan, amig@s!


2 comentarios:

  1. Moi boa pinta, moi orixinal. Heinas probar!

    ResponderEliminar
    Respostas
    1. E son moi saborosas ☺️! Xa nos contarás se as probas 😘

      Eliminar