martes, 16 de outubro de 2018

Noodles de arroz con gambas

Bo día, bolboreteir@s! Falabamos no último artigo de puntos recomendábeis da cidade da Coruña e claro, con tanto comentar, acabou por nos entrar a fame. Precisamente coa mención do Thai Market, veunos á mente a posibilidade de argallar cuns noodles, un dos produtos estrela da carta thai.
Estes fideos xaponeses andan a gañar visibilidade na nosa gastronomía, convivindo coa xa asentada pasta italiana. Aínda que as similitudes son evidentes, as texturas e sabor dos mesmos fican distantes.
Pensamos desta volta en lle darmos sabor con verduras e gambas mais recomendámosvos sobre todo que experimentedes con eles e procuredes cal pode ser a combinación axeitada para vós. Aquí fica esta idea.


Noodles de arroz con gambas


Ingredientes:

  • Noodles de arroz
  • 200 g de gambas
  • 1/2 cabaciña
  • 1 cenoria grande
  • 2 dentes de allo
  • 1 cullerada de curry
  • Pementa moída
  • Sal
  • Aceite de oliva
  • Auga


Utensilios: unha pota (ou unha cunca grande), unha tixola, unha mandolina (ou relador) e unha culler de pau.


Elaboración:


Para comezarmos, temos de sumexir os noodles nunha pota con auga morna. Deixámolos así 15-20 minutos. 


Mentres tanto, preparamos o acompañamento. Nunha tixola con dúas culleradas de aceite rustrimos as gambas, xa cocidas, e os dentes de allo. Cando estan listas, retiramos do lume e reservamos. 


Na mesma tixola que fixemos as gambas, engadimos un chisco máis de aceite e rustrimos a cabaciña e a cenoria reladas. Cociñamos 5-6 minutos.


De seguir, botamos, de novo, as gambas e os dentes de allo e mesturamos moi ben. 


Agregamos a cullerada de curry e o sal e a pementa ao gusto. 



A continuación, escoamos os noodles e engadímolos tamén. Rustrimos 3-4 minutos todo xunto. 


E xa estarían listo para comer! 


Agardamos que vos gusten e que poñades en práctica esta deliciosa receita. 


Ben, con este apetecíbel e proveitoso prato imos facer un parón dun par de semanas que vos explicaremos nos próximos días. Tranquis que é por bo motivo e de felicidade! Non imos estar e, por tanto, non andaremos moito na rede. Estade atent@s porque esta é unha semana de moitísimas novidades! Fortísima aperta, amig@s!

1 comentario: