Lombo recheo

Martes de Entroido, feseta en diversas localidades de Galiza. Aquí mesmo, en Viveiro, temos feriado hoxe, con desfile e troula, mais non descansan as receitas.

Como xa supomos que andaredes arriba de cocido, filloas ou orellas, nós xa imos preparando a volta á realidade, ao menús do día a día.

É certo que non nos preocupa tanto a depuración como após o Nadal porque aínda que estes días papamos moitas larpeiradas, non son o mesmo estes doces máis naturais que os do Nadal onde entra moito comercial... Sexa como for, algo de compensación haberá que facer, que o que levamos papado...

Ben, imos pois coa última creación, no que achegamos unha idea para degustar unha carne que en ocasións “peca” de seca, da forma máis substanciosa e saborosa.

Imos alá!

Lombo recheo

Ingredientes (para 4-6 persoas):

• 1 kg de lombo
• 8-9 lascas de bacon
• 8-9 lascas de queixo
• 1 vaso de viño branco
• Allo en po
• Pementa moída
• Ourego
• Romeu
• Aceite de oliva

Utensilios: unha táboa e un coitelo, unha fonte apta para o forno e papel de aluminio.

Elaboración:

Para comezarmos, temos de cortar o lombo en lascas, mais sen chegar ao final, ten que parecer un libro 😉. Adobamos con allo, ourego, romeu, pementa moída e sal ao gusto. 

De seguir, en cada oco, colocamos unha lasca de bacon e outra de queixo. 

Poñémolo sobre papel de aluminio e botamos un pouco de aceite e a metade do viño branco. 

Despois envolvémolo. completamente e colocámolo na bandexa do forno. Enfornamos, co forno prequente, a 180º, calor arriba e abaixo, durante 1 hora.

Pasado ese tempo, retiramos o papel de aluminio, volvémolo colocar na fonte e botamos o prebe que soltou no papel albal. Agregamos o resto do viño e un chisco máis de aceite.

Volvemos enfornar, a 180º calor arriba e abaixo, até que se doure (tede coidado que non se torre moito o bacon), serán aproximadamente 20 minutos. 

E xa estaría listo para comer! 

Como podedes ver, é un cociñado do lombo sinxelo, e o mellor, cando o degustaredes que sobre todo é efectivo. 

Poucas actividades máis pracenteiras que probar pratos novos e saian tan exitosos coma este. Agardamos a vosa experiencia. Unha forte aperta, bolboreteir@s, desfrutade do Entroido!