Tumbet mallorquino

Ola, bolboreteir@s!! Como levades a semana? Supomos que moit@s de vós de vacacións e outr@s, coma nós, estaredes agardando a que chegue o tempo de descansar. E máis se veñen días de sol coma o de onte e tamén hoxe, que ganas de praia!!

E como por aquí xa temos as vacacións reservadas a unha das nosas terras favoritas (tamén porque alí temos familia), decidimos preparar un dos seus pratos máis tradicionais, especialmente no verán. Si, estamos a falar do tumbet típico mallorquino.

Como é de agardar nos menús mediterráneos, as verduras son as protagonistas, aínda que aquí a atención culinaria é repartida entre tomates, pementos, berenxenas e patacas a partes iguais. Vaia prato tan completo e tan saboroso!

Velaquí o tedes:

Tumbet mallorquino

Ingredientes (para 2 persoas):

• 2 patacas
• 2 tomates
• 1 berenxena
• 1/2 pemento vermello
• 1 pemento verde
• 4-5 dentes de allo
• Aceite de oliva
• Pementa moída
• Alfábega
• Sal
• 1 chile (opcional)

Utensilios: 2-3 tixolas, 2 culleres, un ou dous pratos con papel absorbente, unha táboa e un coitelo (e mandolina) e un prato para presentar. 

Elaboración:

Para comezarmos, temos de facer a salsa de tomate. Para iso, quentamos unha cullerada de aceite e engadimos os tomates, cortados en anacos. Sazonamos con pementa moída e sal e deixamos que se cociñen a lume medio. 

Mentres tanto, rustrimos, tamén en dúas culleradas de aceite, os pementos cortados en xuliana. Adobamos, de novo, coa pementa e o sal e, de ser o caso, co chile. 

Cando estean listos, engadímolos á salsa de tomate e deixamos que se sigan cociñando a lume baixo mentres preparamos o resto dos ingredientes. Agregamos unha pouca de alfábega.

Mentres tanto, cortamos as patacas en láminas coa mandolinan ou coa táboa e un coitelo ben afiado. E rustrímolas en abundante aceite con allo. Os allos botámolos enteiros mais previamente aplastámolos co coitelo. 

Cando as patacas estean listas, poñémolas nun prato con papel absorbente para eliminar o exceso de aceite. Sazonamos con pementa moída e sal. 

Mentres se fríen as patacas, cortamos en lascas as berenxena e facémolas nunha tixola cunha gota de aceite. Sazonamos con pementa moída e sal. 

 E chegou a hora de montar o noso prato! Empezamos poñendo unha capa de pataca. 

 Sobre ela, unha de berenxena. 

E, finalmente, unhas culleradas de salsa de tomate. 

 E xa estaría listo para comer! Agardamos que vos guste e que o faigades na casa porque é delicioso!

Quedounos tan xeitoso... Cando vaiamos alá probaremos o que fan mais xa vos dicimos que ten difícil superar este que preparamos e que resultou todo un éxito.

Ademais, encántanos descubrir pratos coma estes que chaman con forza á porta dos nosos menús recorrentes por aspectos económicos e por suposto culinarios. De probardes, comprobarédelo vós mesmos.

Unha forte aperta, amig@s e que sexades moi felices!