Flocos de millo doces

Receita das emotivas e das levaban tempo marcadas na nosa axenda. Os flocos de millo doces son unha das nosas madalenas de Proust, non pola elaboración caseira senón porque recorda a tempos da infancia nos que, as viaxes a Lugo, tiñan como máxima motivación o retorno cun bo caldeiro destes. Si, había unhas tendas de lambetadas que vendían estes flocos de cores en diferentes tamaños e sempre levabamos o grande. Vai festín na viaxe de volta!!
E aínda hoxe devecemos por elas. Obviamente, non son para comer a diario mais o seu sabor de vez en cando supón toda unha ledicia gastronómica. Curiosamente, estes flocos de millo dividen o mundo entre seguidores/as e detractores/as. E nós estamos claramente entre os primeiros. Certo é que teñen uns sabor moi doce e apto só para @s máis lambonciñ@s; ademais deixan lonxe os flocos de millo tradicionais.
Así pois, soñabamos con dar coa súa preparación caseira. Despois dalgún que outro experimento acabamos por dar coa solución e coa receita que logra uns flocos de millo doces tal e como imaxinabamos. Poderiámolos facer cunha cor mais... claro, facíanos ilusión que fosen como os mercados e encher a nosa cociña de cores! Como agora xa temos claro o proceso, queriamos transmitírvolo da forma máis clara e directa, a través do Youtube nunha nova VÍDEO-RECEITA que deixamos AQUÍ. É tempo pois de cociñar, saborear e sobre todo, desfrutar!

Flocos de millo doces

Ingredientes:

• Flocos de millo
• 150 ml de auga/ cada cor
• 120 g de azucre /cada cor
• Colorantes de cores

Utensilios: unha tixola con tapa (ou microndas), outra tixola pequena, papel vexetal e unha culler de pau.

Elaboración:

Para comezarmos, temos de facer os flocos de millo (se temos mazorcas caseiras coma no noso caso, perfecto; senón, podemos encontrar os grans no super). Para iso, quentamos unha tixola, botamos os grans de millo, tapamos e esperamos a que se fagan todos. Teremos que mover a tixola de cando en cando para que non se peguen. Cando estean listas, retiramos do lume e reservamos.

Agora temos que facer o caramelo. Temos que agregar nunha tixola a auga, o azucre e dúas gotas do colorante que máis nos guste. Mesturamos moi ben e quentamos a lume medio até que ao pasar unha culler o caramelo tarde un momento en volver ao sitio. Porén, temos que ter coidado en non deixalo moi espeso para que sexa máis fácil de integrar cos flocos.

De seguir, botamos o caramelo sobre os flocos e mesturamos moi ben.

Estirámolos sobre papel vexetal para que seque o caramelo. Tardará 5-10 minutos.

Pasado ese tempo, xa estarían listas para comer!!! Podédelas facer de cantas cores vos gusten ;)

Esperamos que vos gusten e que as fagades na casa para ver unha peli ou unha serie!! 

Nós con isto xa temos para unha tarde de cinema, dozura e descanso. Canta felicidade! Évos boa verdade que pouco fai falta ás veces :-) Tede coidado co teclado ao visualizardes a vídeo-receita pois babexaredes inmediatamente con ese caramelo que ofrece todo o seu sabor e intensidade aos flocos de millo. Ñam, ñam! A gozar, bolboreteir@s!