Merengues de cores

Xa estamos por aquí unha vez máis. Xa veriades polas redes sociais que levamos unhas semanas de moitísimo movemento. E iso é bo, moi bo!

Como xa anunciamos en Facebook e demais, o venres 28 de abril estaremos no Hotel Hesperia Finisterre, no congreso "Gastronomía y Alimentación 2.0", convidados por Ecom Events. Teremos a sorte de compartir mesa dentro da sección "Experiencias de éxito" con Gastro y Política, Lucía Baballa ou Beis-Burguer Culture. Tedes máis info e o programa aquí. Nós, estamos contentísimos de desfrutar dunha oportunidade coma esta para visibilizar a nosa proposta e tamén a relevancia do galego na rede.

E para festexalo, démonos un festexo de cores! Ben, para festexalo e para recibir a Begoña Fontenla e o equipo da Revista da TVG, que pasaron onte por Viveiro para gravar unha reportaxe sobre Bolboretas no bandullo. Estamos contentísimos coa experiencia e agradecidísimos a Begoña pola oportunidade. Xa avisaremos, claro, da emisión :-)

Aquí vai este resultado larpeiro de tanta ledicia:

Merengues de cores

Ingredientes:

• 4 claras de ovo (140 gr)
• 280 gr de azucre
• 1 cullerada de vainilla
• Colorantes alimentarios
• Para decorar: boliñas de cores 

Utensilios: unha cunca grande, un batedor eléctrico, varias cuncas pequenas e culleres, unha bandexa de forno e papel vexetal.

Elaboración:

Para comezarmos, temos de batir as claras coa axuda do batedor eléctrico. 

 Cando empecen a subir, imos engadindo o azucre pouco a pouco. 

Despois, engadimos a vainilla e seguimos batendo. 

Até que estean a punto de neve. 

A continuación, separamos a mestura en diferentes cuncas, o número delas dependerá do número de cores. Nós útilizamos 3 cores. azul, lila (mesturando azul e vermello) e amarelo. 

De seguir, botamos a mesturas en diferentes mangas e ímoslles dando forma sobre a bandexa de forno cuberta con papel vexetal. 

Enfornamos, co forno prequente, a 95º, calor arriba e abaixo, durante 1 hora. 

Pasado ese tempo, quitamos os merengues do papel e colocámolos na fonte en que imos presentar os merengues.

Como vedes, é unha receita moi sinxela e moi vistosa, que deixará a tod@s @s convidad@s abraiad@s! E xa vedes a versatilidade do merengue. Se tedes a xornada con afán artístico seguro que logrades auténticas marabillas. E unha vez degustado... alcanzaredes os altares da dozura. Superrecomendábel para lambonciños 100%.

Notamos que algúns/algunhas xa están babexando... por que será? haha. Unha aperta e grazas por estardes sempre aí!