Torta de chocolate e nata branquiazul

Amig@s lambonciñ@s, xa para ir rematando esta semana de múltiplas sorpresas, traemos unha torta de aniversario para unha pequena amiga que, como podedes ver, é moi moi deportivista. Por tanto, que mellor que decorar esta larpeirada con motivo branquiazul?
Xa levamos unha torta do Depor e outra do Barça, agardamos non perder lectores dos clubs rivais, haha. Mais eu penso que esta sobremesa merece ben a pena comela sexas do equipo que sexas, posto que mestura un biscoito de chocolate moi ben feito, moi esponxoso, cun dobre recheo de nata que o convirte nun manxar divino. Chocolate, nata... que máis pedir?
As obleas van ao gusto do consumidor e podédelas conseguir nalgunhas pastelarías, tendas de repostaría creativa etc. O sabor... ben, o mítico deste papel comestíbel, mais ornamentalmente fan unha achega importante ás tortas. Sempre queda a opción de debuxar a man esa decoración con fondant, mais... dá o seu traballo e desta volta non había moito tempo.
E que, apetece un bocado desta torta futboleira?

Torta de chocolate e nata branquiazul

Ingredientes: 

Para o biscoito:

• 4 ovos
• 1 vaso e medio de fariña 
• 1 vaso e medio de azucre
• Medio vaso de leite
• Medio vaso de aceite
• 2 culleradas de cacao en po 0%
• 1 sobre de lévedo en po
• Unha pouca de fariña (para o molde)
• Un chisco de manteiga (para o molde)

Para o recheo e a decoración:

• 750 ml de nata
• 5-6 culleradas de azucre
• Colorante azul
• Unha oblea de arroz

Utensilios: un molde de 26cm, 3 cuncas, un batedor eléctrico (ou manual), unha espátula, un coitelo, dúas mangas pasteleiras e dous bicos.

Elaboración:

Para comezarmos, temos de bater os ovos co azucre até que os ovos dupliquen o seu tamaño.

De seguir, engadimos o aceite e o leite.

Botamos o cacao, a fariña e o lévedo mesturados. 

Batemos a mestura até que todos os ingredientes estean integrados.

Engrasamos o molde coa manteiga e a fariña (opcionalmente, se é un molde desmoldábel, podemos pór papel vexetal para que sexa máis sinxelo sacalo del) e botamos a mestura aí.

Enfornamos a 180º, calor abaixo e ventilador, durante, aproximadamente 1 hora. Deixamos arrefríar completamente.

De seguir, debemos dividir o biscoito en tres capas para facermos dous pisos co recheo.

A continuación, montamos a nata co azucre e dividímola en dúas partes, para podermos tinguir unha de azul e poder facer a nosa decoración. Colocamos a parte superior do biscoito sobre o prato en que a imos presentar e cubrímolo cunha capa abundante de nata azul.

Cubrimos coa parte central do biscoito e estendemos unha capa de nata branca e, finalmente, tapamos coa parta inferior do biscoito para que a superficie sexa máis recta.

Estendemos unha capa finiña de nata por todo o biscoito e, no centro, pegamos a oblea. Despois, botamos o resto das natas nas mangas pasteleiras co bico e imos facendo liñas intercalando as natas ao redor da oblea e do biscoito. 

Refrixeramos 2 horas para que se asenten os sabores e xa estaría lista para comer! Agardamos que vos guste.  

O azul como vedes quedou moi suave e talvez algo máis claro do que corresponde coas cores do equipo, mais na configuración da torta daba á perfección. Xa vedes que sorpresa ao cortar o primeiro bocado. A pequeamiga, que cumpría dez anos levou unha verdadeira sorpresa, aínda que pouco durou xa que entre tod@s @s convidad@s fixémola desaparecer nun momento, hahaha.
Agardamos que vos animedes a probar con ela. Coa vosa personalización claro, sexa de equipo de fútbol, de motivo paisaxístico ou amoroso. Lémonos, bolboreteir@s!