martes, 22 de marzo de 2016

Arroz con choco na súa tinta

Chegamos hoxe un pouco tarde, mais chegamos, que é o importante, ou non? E facémolo arrasando, cun clásico da gastronomía galega, arroz con choco na súa tinta. 
Non sabemos moi ben o motivo mais este sempre foi un prato ao que lle tiñamos certo respecto, e de feito, nunca até agora probaramos a facelo. Aproveitabamos as oportunidades para degustalo naquelas casas de xantar que ofrecen este manxar. Mais agora xa non será preciso agardar a que nolo cociñen fóra. Na receita de hoxe aclaramos todo o necesario para lograr esta larpeirada marítima. Aínda que a clave, como xa dixemos na última receita de choco en salsa, está no produto. E o noso é de 10, grazas a un mariñeiro viveirés de moita arte e solidariedade. Grazas a el unha outra vez :-)
Vai pois, un novo agasallo gatronómico para vós:

Arroz con choco na súa tinta


Ingredientes (para 4 persoas):

  • 1 choco mediano
  • 1 cunca de arroz
  • 1 pemento vermello
  • 1 cebola
  • 1 tomate
  • A tinta do choco
  • 1 vaso de viño branco
  • 2-3 culleradas de aceite
  • Auga
Utensilios: unha táboa, un coitelo e unha pota grande.

Elaboración:

Para comezarmos, temos de picar as verduras e botalas no fondo da pota sobre as culleradas do aceite. 


De seguir, engadimos o choco, ben lavado e picado en anacos. 


Mesturamos ben e engadimos o viño branco. 


Cociñamos a lume medio durante, aproximadamente 45 minutos, ou até que o choco estea case feito. 


Engadimos o arroz.


E a tinta do choco. Lembrade pois, se mercades o cefalópodo, pedir a tinta. Non vaia ser que queiramos facer choco en tinta sen a ter, haha.


Botamos a parte de auga correspondente co arroz, no noso caso 3 cuncas de auga por 1 de arroz. 


Deixmaos cociñar o tempo que precise o arroz, entre 15-18 minutos, aproximadamente. 


Deixamos repousar 5 minutos e xa estaría listo para comer! 


Agardamos que vos guste! Nós collímolo con tantas ansias que papamos todo. E ben agusto que ficamos posto que era un reto cociñeiro do que nos beneficiamos alimentariamente, hehehe. Aínda temos un outro choco no conxelador. Agora preséntase a seguinte cuestión: repetirmos éxito con este arroz con choco na súa tinta, ou optarmos por unha receita atrevida e ben diferente? Pois non son poucas as dúbidas de momento. Mais ben, xa vos contaremos. 
Mil grazas por estardes sempre aí e apertas! Que sexades felices nestes días de descanso e agradedes ben o bandullo!


5 comentarios:

  1. como me gusta este plato! es de mis favoritos y tu lo has boradado bicos

    ResponderEliminar
    Respostas
    1. Moitísimas grazas! A verdade é que era a primeira vez que o facíamos e encantounos, seguro que non tardamos en repetir!
      Bicos!

      Eliminar
  2. Este é un dos meus arroces favoritos, encántame..!!veña unha racionciña!! :)

    Bicossss

    ResponderEliminar
  3. Este é un dos meus arroces favoritos, encántame..!!veña unha racionciña!! :)

    Bicossss

    ResponderEliminar