Choco en salsa

Que alegría levamos a semana pasada, cando un amigo nos avisou de que nos trouxera uns chocos da súa última saída ao mar. Co que a nós nos gustan estes cefalópodos! 

Por suposto, xa pensamos na súa elaboración e como non estamos moi afeitos a traballar con este produto optamos polo xeito tradicional de o facer na nosa casa, seguindo os pasos da instrutora experta, haha.

E lográmolo, conseguimos un prato acorde ao produto. A verdade, con este choco, pouco se había que complicar xa que de por si só é un verdadeiro manxar cheo de tenrura e sabor.

Se gustades dos cefalópodos, anotade a receita porque se dá moi ben para facer destacar o elemento principal. E con moi pouco traballo, que tamén resulta importante.

Aí o tedes:

Choco en salsa

Ingredientes:

• 1 choco
• 1 tomate
• 1 cebola
• 1/2 pemento vermello
• 1/2 pemento verde
• 2-3 dentes de allo
• 1 vaso de viño branco
• 1/2 vaso de aceite
• Un chisco de sal

Utensilios: unha pota, un morteiro e unha culler.

Elaboración: 

Para comezarmos, temos de cortar o choco en dados. 

A continuación, poñemos ao lume a pota, sen nada de aceite, e, cando estea quente, engadimos o choco. Deixamos que se cociñe até que mude a cor, aproximadamente entre 5 e 7 minutos. 

Deixamos que evapore un pouco a auga que soltou e engadimos os allos machucados cun chisco de sal.

Mesturamos moi ben e engadimos a cebola, que debe estar ben picadiña. 

Cociñámola durante 2-3 minutos e agregamos os pementos, tamén, ben ficados finamente.

Mesturamos de novo e cociñamos durante 4-5 minutos. De seguir, engadimos o tomate, cortado en anacos pequenos. 

Mesturamos ben e botamos o aceite e o viño branco. 

Agora temos dúas opcións. Se o facemos nunha pota normal, deberemos cociñar o choco a lume medio durante, aproximadamente 1 hora. Nós, neste caso, utilizamos unha pota rápida e levoulle, máis ou menos, 20 minutos, mais o tempo que tarda en abrir a pota.  

Pasado ese tempo, temos que probar se está brandiño e se o punto de sal está ao voso gusto. 

E xa está preparado para comer! Que aproveite!

Os que valorades un bo choco, entenderédesnos cando denominamos isto como manxar. Desfaise na boca collendo o sabor que lle aporta ese mollo suave mais ao tempo, notábel. Un mollo que, unha vez rematado o choco, aproveitamos até a fin cun bo pan tradicional. Ideal con bo miolo para recoller a verduriña triturada que nos queda sobrante, e que merece a pena levar tamén ao bandullo.  Que gozada!!

Ben, deixámosvos con esta nova receita e mandámosvos unha aperta ben forte para contrarrestrar un pouco esta friaxe. Lémonos!!