Papas San Miguel

O sábado é un dos mellores días da semana, e un dos motivos está na presentación de cada nova receita aquí. Canto nos prace traervos pratos diversos cada semana para que podades pór en práctica. 

E a de hoxe forma parte da gastronomía que coñecimos en Andalucía, concretamente nunha taberna de Sevilla. Xa vos avisamos de que habiades obter beneficio desa nosa viaxe, e aquí tedes unha proba, haha.

O camareiro recomendounos, por típica, unha ración destas patacas e encantaráronnos. E pensando en pola en práctica procuramos información a respecto do seu nome ou tamén da súa presenza noutros territorios e chamounos a atención a carencia de datos ao respecto na rede. Así que, ou o de típico o inventou quen nos atendeu, ou alí é unha ración propia creada polo propio local. Sexa como for, nos quedamos con todos e cada un dos ingredientes para a elaborar fielmente. Desta forma, quedamos cun anaco de Sevilla para sempre. Que o bandullo ten moi boa memoria :-)

Papas San Miguel

Ingredientes (para 2-3 racións):

• 3 patacas grandes
• Maionesa allada (receita aquí) 
• 2-3 lascas de salmón afumado
• 1/2 vaso de viño branco
• 2 culleradas de aceite
• Pirixel
• Pementa moída
• Sal

Utensilios: fonte apta para forno, batedor eléctrico, coitelo e culler.

Elaboración: 

Para comezarmos, temos que pelar, lavar e cortar as patacas en cadradiños. Colocámolas nunha fonte para forno. Botámoslles un chisco de pementa moída e sal.

Engadímoslles o aceite e o viño branco.

Despois, un pouco de pirixel picado e mesturamos moi ben. 

Enfornamos a 200º, calor arriba e abaixo, durante 25-30 minutos, ou até que estean brandiñas e un pouco douradas. 

De seguir, botámoslles dúas ou tres culleradas de maionesa allada (receita aquí), á que lle podemos engadir un chisco de pirixel.

E, sobre a maionesa, colocamos lascas de salmón afumado e un chisco máis de pirixel.

E xa estarían preparadas para comer! Agardamos que vos gusten :)

Son ou non apatecíbeis? Un dos xeitos máis cremosos e saborosos de degustar patacas. Sexan San Miguel ou San Pataco, merece a pena mercarmos un pouco de salmón para lle tirar o máximo rendemento a este foráneo, mais xa tradicional tubérculo, que ben pode ocupar o posto principal en calquera menú cunha receita tan rica.
Desde xa, tedes un pouco de gastronomía sevillana en galego ao voso dispor. Unha fortísima aperta!!!!