Faragullas de pescada

Non queremos que pensedes que nos esquecemos do peixe, eh! Que ben bo que está, aínda que talvez o deberiamos aumentar na nosa alimentación. E un dos que sempre temos a man é a pescada, xa que o consideramos superversátil e recorrente.

Mais para que vexades que non todo está planificado na cociña e non todo sae ben, contámosvos como chegamos a esta receita. De seguro que vos teñen pasado cousas parecidas:

Tiñamos pensado aproveitar media pescada que tiñamos no forno para lle sacar uns filetes e facelos á grella. Mais claro, era a nosa primeira vez para dito labor. E fracasamos, haha. Non fomos capaces de lamilas a pescada, a falta de experiencia pagouse desta volta. Mais claro, non iamos desaproveitala, por suposto que non. E o que fixemos foi retirar os anacos que desfixemos na tentativa, para elaborar unha receita con eles. E isto foi ao que chegamos:

Faragullas de pescada

Ingredientes (para 2 persoas):

• 1/2 pescada
• 1/2 cogombro
• 2-3 dentes de allo
• 1 presa de pirixel
• 1 chili
• 2 culleradas de aceite
• Auga
• Sal

Utensilios: unha pota, unha cunca, unha culler, unha tixola e un coitelo.

Elaboración:

Para comezarmos, temos de cocer a pescada nunha pota con auga e un chisco de sal, tardará, aproximadamente, 15 minutos. Despois esfaragullámola e reservamos.

De seguir, rustrimos os dentes de allo laminados e o chili no aceite até que se douren.

A continuación, botamos sobre a pescada os allos dourados, o aceite e o chili (opcional), xa que iso será o seu aliño. Botamos tamén o pirixel picado.

Pelamos e cortamos o cogombro, en anacos pequenos, e engadímolo á mestura.

Mesturamos moi ben e xa está lista para comer!!

Xa vedes, hai que saber saír dos apuros dunha ou outra forma. E a verdade é que desta volta ficamos máis que satisfeitos coa solución. Este prato ten moitas similitudes co salpicón de pescada, mais cunha textura especial e con certos ingredientes cos que pretendiamos darlle un toque orixinal. 

Se dicimos que a pescada e tan versátil é por feitos coma este. Tanto se dá para comer fría como quente, en salsa ou á pranca. Iso si, vós xa podedes optar por cocer os anacos de merluza enteiros e desfaragullala posteriormente. Non é presiso que sigades o paso do "falso cortado de filetes" hahaha.

Ben, pois agardamos que lle tiredes proveito a este invento. Xa nos contaredes ou nos enviaredes foto. Apertas!!