mércores, 12 de novembro de 2014

Empanada de mexillóns

Hoxe traémosvos unha receita destas que consideramos moi sinxeliñas, mais das que prestan, e ben! Non é a primeira empanada que aquí presentamos, así que non vamos incidir máis no seu carácter autóctono :-) Simplemente merece a pena valorármola como corresponde, entre outras cousas polas posibilidades que nos dá. Case podemos facer empanada con cada produto que se nos veña á cabeza, e tamén con moi diferentes combinacións. Claro está, que unhas estarán mellores que outras. E a de mexillóns está na nosa listaxe de empanadas preferidas, porque desfrutamos moito deste molusco e porque con esta receita resulta moi complexo que vos quede seca, nin sequera un par de días despois de a facerdes.

Empanada de mexillóns

Ingredientes:
  • Masa empanada (receita aquí)
  • 1 1/2 kg de mexillóns
  • 1 pemento grande vermello
  • 1 pemento grande verde
  • 1 cebola grande
  • 1/2 vaso de viño branco
  • 2 culleradas de pemento doce
  • 1 ovo batido
  • 15 gr de manteiga
  • Sal
  • Aceite


Elaboración:

Para comezarmos temos que facer a nosa masa (receita aquí). Neste caso, nós fixemos a masa con 1 kg de fariña xa que queríamos que fose bastante grande. Mentres a masa sube, aproveitamos para facer o recheo. Lavamos e cortamos en xuliana os pementos e a cebola. Rustrimos os pementos en dúas culleradas de aceite. 


Cando o pemento abrande un pouco, engadimos a cebola. Botamos un chisco de sal para que se cociñen antes. 




Engadimos os mexilóns (os nosos eran conxelados, así que o único que fixemos previamente foi desconxelalos) e mesturamos ben. 


Botamos o viño branco e deixamos cociñar até que se evapore case todo o líquido. 


Engadimos o pemento doce e mesturamos ben, deixamos cociñar uns minutos máis e xa teríamos o recheo preparado. 











Estiramos a metade da nosa masa e colocamos sobre ela o recheo.


Cubrímola coa outra metade da masa e selamos ben os bordos.Como vedes, coa masa que nos sobrou puxemos o meu nome, xa que foi un dos aperitivos para a cea de celebración do meu aniversario. Encántannos esa masa que pomos por encima da empanada, xa sexa paus ou letras, están moi ricos. Pintamos coa manteiga, que debe estar derretida e co ovo batido. Enfornamos a 220º, calor arriba e abaixo, durante 20-25 minutos.


Deixamos que arrefríe un pouco e xa estaría lista para comer. Pouco máis vos teño que dicir. Que se até o de agora non vos coincidiu de probar este manxar, pois xa tedes algo que preparar hoxe ou nos próximos días. É unha combinación exitosa que nós encantou e que xa estamos pensando en repetir proximamente. Agardamos que a desfrutedes vós tamén.  
Aquí vos queda unha outra boa idea para o recheo da empanada. Moi recomendábel. Bo mércores amig@s!

Ningún comentario:

Publicar un comentario