Na Mesa de Natal Não Pode Faltar

Bolboreteir@s, volvemos a facer uso do venres para despedir o proxecto natalicio chegado desde Portugal e que ten este venres 23 de decembro como última xornada, a de recompilación de todas as receitas que os diferentes blogues participantes, 14 portugueses e un galego, fomos achegando á rede.

Estas semanas deron para coñecermos persoas e cadernos dixitais marabillosos, dos que hai moito por aprender e, sobre todo, moitísimo para saborear. Agardamos, ademais de pasarmos uns momentos marabillosos navegando por estes oceános dixitais, que tirásedes proveito das diferentes opcións que se foron presentando a través das redes sociais e que hoxe xuntamos para vós.

Estas suxestións de Nadal teñen moitos puntos positivos e un deles é o de ampliarmos as posibilidades pois moitas destas sobremesas son tradicionais de zonas concretas das que nós apenas temos información. Así, como sempre recordamos, hai moito máis alén dos turróns, polvoróns e mazapáns, e esta é unha boa acumulación de recursos. Aí vos van os resultados do reto que lanzou a amiga Ana, de A casinha das bolachas "Na Mesa de Natal Não Pode Faltar".

Na Mesa de Natal Não Pode Faltar: Roscón de chocolate

Menin@s! Lanzáronnos un reto desde Portugal para este Nadal e nós recollímolo con moi bo gusto pois adoramos esta época do ano no que a gastronomía xoga un papel tan relevante.  A idea xurdiu de A casinha das bolachas con quen xa colaboramos na nosa sección "Bitácoras de aquí e acolá". Ben, pois desde comezo de mes, diferentes blogues nominados están a publicar receitas natalicias e a responder a un cuestionario que Ana nos preparou. Estamos acostumados a preparar nós as receitas para o Bolboreteando aínda que desta volta tócanos o papel inverso, o de responder.
Deixámosvos pois con este fermoso reto e cunha receita especial para chocolateir@s nestas vindeiras datas.

Na Mesa de Natal Não Pode Faltar... 

• Quem está por de trás deste blogue?
• Diana e David, unha parella de filolólogos, namorados desde 2005, con paixón pola gastronomía. 
• Quando surgiu o gosto pela culinária?
• É continuo e progresivo desde a infancia, adoptando un papel activo nos últimos 8 anos.
• Quando e como surgiu o blogue?
• O 30 de decembro de 2013, para combinar as dúas paixóns, as letras e a gastronomía. 
• Gostas desta época do ano? Se sim do que mais gostas?
• Si, nesta época desfrutamos moitísimo, tanto do ambiente natalicio, do clima, coma das receitas típicas. 

Bitácoras de aquí e acolá: A casinha das bolachas

Sabedes o que gustamos de argallar para o blogue, verdade? Procuramos novas formas de vos entreter, de aprendermos e darlle novos enfoques a Bolboretas no bandullo. “Bitácoras de aqui e acolá” levaba tempo no noso maxín e foi no último mes cando lle fomos dando forma.

Explicámosvos pois o desenvolvemento e obxectivo desta nova sección que tentaremos aumentar de vez en cando. No fin de facer unha achega importante á consolidación do noso idioma na rede e no ámbito gastronómico, cremos relevante que a través del tezamos fíos máis alá da fronteira. Queremos mostrar como se están a facer cousas ben interesantes en galego e aprender con iso do que fan en blogues doutras partes do mundo. Traeránnos pois outros idiomas e receitas tradicionais a Bolboretas no bandullo, mais tamén levaremos Bolboretas no bandullo e a cociña galega a outros cadernos dixitais. 

Entendemos pois que debiamos comezar con Portugal pola evidente continuidade lingüística e tamén pola proximidade cultural. Con todo, son moitas as sorpresas que nos ofrece a gastronomía lusa que cremos merece ben a pena coñecer.

Así pois arrincamos co blogue portugués A casinha das bolachas, que presenta hoxe mesmo a nosa receita de intercambio. Desde que coñecemos este caderno tiñamos claro que era unha óptima opción pola atracción polo doce e polo traballo constante que vén realizando desde 2015. Ademais, a súa creadora, Ana, é unha persoa encantadora e moi amábel! Do mesmo xeito ca nós, o seu blogue xurdiu a partir das galletas que preparaba para as súas amizades. Sentiu a necesidade de partillar as súas receitas que tanto gustaban. Ademais, o computador ofrece un pouco de orde ao seu corpus gastronómico. A súa relación coa cociña é totalmente apaixonada, desfrutando de cada paso e de cada resultado. Porén, non pensedes que fica só en bolachas. Ana fai un traballo inmenso con actualizacións case diarias co doce como principal paixón mais dando lugar a moi diversas posibilidades. Adoramos receitas súas como as bolachas de limão, Pudim Molotof ou o recente bolo japonês.