Torta de chocolate e framboesas

 Bo día, bolboreteirxs! Aquí estamos un día máis compartíndovos receitas. Desta volta, presentámosvos a torta que fixemos para o primeiro aniversario da pequena da casa e, como podedes comprobar, aproveitamos moi ben a decoración dos animaliños do bosque. 

Decidímonos por esta torta xa que é moi vistosa e sinxela de facer e, aínda que ela non a pode comer (ela tiña as bolachas que vistes na anterior receita), a maioría adoramos o chocolate, iso si, tede en conta que farta moito!, mais, aínda así, houbo xente que repetiu. 

Como ides ver, temos unha torta riquísima con moi poucos pasos:

Torta de chocolate framboesas

Ingredientes:

• 1 lámina de masa crebada
• 525 g de nata para montar        
• 450 g de chocolate de sobremesas
• 225 g de manteiga
• 1 cullerada de canela

Para decorar: 

• Framboesas

Árbore de Nadal (10º aniversario)

Bo día, bolboreteirxs! Hoxe é un día moi especial, non só porque é a última receita deste ano 2023, senón tamén porque hoxe é o noso 10 aniversario. 10 anos xuntos, bolboreteirxs, nos que compartimos receitas e vivistes con nós moitos momentos especiais da nosa vida. Mil grazas polo voso apoio e por estar sempre aí léndonos e apoiándonos neste aventura. Sodes unha motivación para seguirmos cociñando e xogando cos ingredientes. 

Como vos contamos o outro día, estamos embarazados de novo, en breves teremos a Maia con nós e agardamos que sigades vendo desde as vosas pantallas como este amor e estas receitas medran e medran. 

Para celebrarmos este décimo aniversario, deixámosvos a última receita do ano, unha árbore natalicia moi vistosa, ideal para rematar a última cea do ano ou empezar o 2024 da mellor forma posíbel. 

Evidentemente, sabemos que nas vosas mesas non han de faltar turróns, mazapáns e doces tradicionais de todo tipo mais como son datas de xuntarnos a nós sempre nos gusta tirar dalgún recurso orixinal coa intención de sorprender. Velaquí esta nosa idea que a fin de contas resume un pouca as nosas intencións nestes dez anos, achegarvos unha pouca de cor e moito moito sabor. 

Árbore de Nadal (10º aniversario)

Ingredientes: 

• 2 láminas de follado     
• 1 ovo 
• Azucre 

Para a crema pasteleira de laranxa e canela: 

• 1/2 l de leite 
• 80 g de azucre 

Galletas natalicias

Bo día, bolboreteirxs! Facer galletas é un dos plans favoritos dos días de choiva ou de frío que non apetece moito saír da casa; ademais, se as facemos en familia todo é máis especial, porque os peques sempre están moi motivados. Alén disto, cando as galletas estean feitas podemos facer un chocolate quentiño mentres desfrutamos dunha película xuntos. 

Estas galletas tamén son ideais para regalar, meténdoas nunhas bolsiñas bonitas cun lazo, ou incluso para facer adornos para a árbore comestíbeis. Son agasallos do máis especial, xa que están feitos con todo o noso cariño e amor. 

Galletas natalicias

Ingredientes: 

Para as galletas: 

• 145 g de fariña 
• 50 g de fariña de améndoa        
• 115 g de manteiga 
• 60 g de azucre glas 
• 1 culleriña de vainilla 

Madalenas de chocolate terroríficas

Bo día, bolboreteirxs! Hoxe traémosvos a primeira receita de Samaín. Esta é unha das nosas épocas favoritas do ano: disfraces, decoración, festas e uns ingredientes para traballar moi moi saborosos. Unhas deliciosas madalenas moi moi chocolateadas. Son deliciosas e cunha textura incríbel. Ademais, podémolas decorar como máis nos gusten, nós decidimos facer uns monstros e unhas pantasmas. 

Madalenas de chocolate terroríficas    

Ingredientes:

Para as madalenas:

• 200 g de chocolate negro (ou con leite) 
• 200 g de nata 35% 
• 150 g de fariña         
• 75 g de azucre 
• 20 g de chocolate en po 0% 
• 2 ovos 
• 1 cullerada de lévedo en po 

Torta tenebrosa

Bo día, amig@s! Como vai. Aquí andamos emocionados xa coa chegada da primeira festa temática do outono. Aproxímase o Samaín, que por sorte vén recuperando terreo nos últimos anos e que nós queremos reforzar desde Bolboretas no bandullo coa creación de receitas axeitadas. Ademais, évos unha festa que dá moi ben co noso carácter. Xa sabedes, aquí somos moi de ánimas en pena, cemiterios e contos de medo arredor da lareira antigamente e agora pois... arredor dunha torta coma esta.

É ideal se tedes peques na casa. O Xiao de momento non dá a súa opinión mais nós imos practicando para cando se emocione máis con estas argalladas gastronómicas de seus pais. Entretanto, agardamos que vos poda servir para darlle un pouco de sabor e escuridade a estes días que se aproximan. Aquí a tedes.

Torta tenebrosa

Ingredientes:

Para o biscoito:

• 200 g de manteiga
• 200 g de azucre
• 190 g de fariña
• 4 ovos
• 1 cullerada de vainilla
• 1 cullerada de cacao puro

Galletas de xenxibre

Bolboreteir@s! Segue a conta atrás para as comiolas máis potentes do ano, tamén as que serven para despedilo así que imos procurar facelo de forma moi saborosa.
Hoxe cunha receita ideal para @s que tedes peques na casa, xa que seguro que adoran o boneco de xenxibre, que non ten unha longa tradición en Galiza mais que se foi incorporando como símbolo natalicio a través de deseños, filmes e rede. Non ten, iso si, aínda apenas visibilidade na nosa repostaría mais nós quixemos facerlle un oco en Bolboretas no bandullo co obxectivo de lanzalo até os vosos fogares.
Xa sabedes, o boneco de xenxibre nace no conto de Nadal no que sae con vida do forno da avoa procurando fuxir mais remata co desenlace agardado para calqueira larpeirada, sendo devorado.
Hai que dicir, que aquí tampouco fuxiu ningún. Bonecos ao bandullo!
Ollade que receita máis divertida e apetitosa!

Galletas de xenxibre

Ingredientes:

• 260 g de fariña
• 150 g de manteiga
• 100 g de azucre moreno
• Unha culleriña de bicarbonato
• 1 culleriña de xenxibre en po
• 1 culleriña de canela en po
• 1 ovo 

Torta multicolor

Larpeiros, larpeiras, estades preparad@s? Hoxe traemos unha receita espectacular que fica xa na historia das dozuras desta casa e que agardamos pase tamén á historia de Bolboretas no bandullo pois cremos que vos vai namorar.
Ben, antes de nada cómpre recoñecer que o principal aspecto co que nos cautiva esta torta é o estético pois o brillo e degradación de cores vivos dan ganas de ficar ollando horas para a torta. Mais claro, unha sobremesa así non pode fallar no fundamental polo que dedicamos empeño para que fose unha delicia inigualábel. E si, podemos ficar satisfeit@s xa que se logrou o obxectivo con creces. Entre oito papamos a torta dunha vez. E porque disimulamos senón cremos que a poderiamos degustar nós nos, hahahaha.
Na realidade era unha torta especial ao ser para o 28 aniversario de quen a preparou e non se podía escatimar na autohomenaxe.
Deixámosvos que comprobedes o proceso para lograr esta marabilla.  

Torta multicolor

Ingredientes:

Para o biscoito:

• 300 g de manteiga
• 300 g de azucre
• 270 g de fariña
• 60 g de cacao
• 1 sobre de lévedo en po
• 6 ovos

Para o almibar:

• 150 ml de auga
• 150 g de azucre
• 1 cullerada de aroma/pasta de framboesa

Galletas terroríficas

Chega unha noite máxica para nen@s e maiores, sobre todo para @s que gustamos do ámbito terrorífico. A noite previa a defuntos, o Samaín.

Aínda que nós non temos peques pola casa non podemos evitar elaborar este tipo de receitas. Iso si, por moito fondant e deseño que haxa, o sabor nunca pode ficar á marxe, polo que procuramos crear unhas galletas básicas, sinxelas mais saborosas.

Mañá, día feriado, é unha xornada ideal para botar un tempo divertido amasando e argallando formas. Coa axuda de moldes/cortadores o traballo estará realizado aínda que se sodes moi máis xeitosos ca nós podedes botar man do deseño e darlles vós mesmos as formas.

Sexa como for, con isto, uns ósos de santo e unha torta caveira podemos pasar unha velada terrorificamente doce, muahahahaha.

Velaquí as tedes:

Galletas terroríficas

Ingredientes:

Para as galletas:

• 185 g fariña, máis para estirar
• 60 g manteiga
• 60 g azucre
• 1 ovo
• 1 cullerada de vainilla
• 1 culleriña de lévedo

Pavlova de chocolate

Tiña que ser, tiña que ser, a primeira torta da canle de Youtube. A primeira receita do blogue, alá por finais do 2013 foi unha torta sendo este tipo de receitas nas que nos centramos nos comezos. Curiosamente, cinco meses despois de abrir a canle de receitas no Youtube aínda non subiramos ningunha co que xa sentiamos un baleiro importante. É certo que a elaboración de tortas na nosa casa está orientada ás celebracións, de aí que nestes últimos meses, ao non coincidir apenas aniversarios ou festexos, non subiramos tortas.

Ben, pois agora nesta tempada veredes como se incrementan pois tivemos algunha persoa a cumprir anos, días especiais e aproxímanse xa as moi diversas festas de primavera e verán. 

Imos pois con esta xoia da cociña oceánica. Si, nunca tan lonxe chegaramos coas receitas e iso que probamos desde Brasil, a Alemaña até chegar a Rusia ou China. Porén, esta torta que encontramos nun vello libro de cociña transportounos a este novo continente. Non se sabe moi ben o país de orixe, ou máis ben, hai unha gran discusión entre dous territorios próximos arredor da súa propiedade orixinal: Australia e Nova Zelandia. 

Iso si, antes de nos adentrarmos na historia, por aquí estabamos seguros da orixe rusa debido a ese nome tan peculiar. Claro, está ligado a unha bailarina dese mesmo país que foi honrada coa elaboración desta torta á chegada a un destes países oceánicos. De feito, na actualidade é unha das sobremesas máis consagradas na repostaría deste territorio. Non sei vós, mais nós non nos perderiamos esta vídeo-receita por nada. Aquí vos deixamos a ligazón á receita na nosa canle de Youtube.

Pavlova de chocolate

Ingredientes:

Para o merengue:

• 6 claras de ovo
• 300 g de azucre glas
• 5 culleradas de cacao en po
• 1 cullerada de vinagre
• 1 cullerada de maicena

Para a crema de queixo:

• 500 ml de nata
• 250 g de mascarpone
• 2 culleradas de azucre

Na Mesa de Natal Não Pode Faltar: Roscón de chocolate

Menin@s! Lanzáronnos un reto desde Portugal para este Nadal e nós recollímolo con moi bo gusto pois adoramos esta época do ano no que a gastronomía xoga un papel tan relevante.  A idea xurdiu de A casinha das bolachas con quen xa colaboramos na nosa sección "Bitácoras de aquí e acolá". Ben, pois desde comezo de mes, diferentes blogues nominados están a publicar receitas natalicias e a responder a un cuestionario que Ana nos preparou. Estamos acostumados a preparar nós as receitas para o Bolboreteando aínda que desta volta tócanos o papel inverso, o de responder.
Deixámosvos pois con este fermoso reto e cunha receita especial para chocolateir@s nestas vindeiras datas.

Na Mesa de Natal Não Pode Faltar... 

• Quem está por de trás deste blogue?
• Diana e David, unha parella de filolólogos, namorados desde 2005, con paixón pola gastronomía. 
• Quando surgiu o gosto pela culinária?
• É continuo e progresivo desde a infancia, adoptando un papel activo nos últimos 8 anos.
• Quando e como surgiu o blogue?
• O 30 de decembro de 2013, para combinar as dúas paixóns, as letras e a gastronomía. 
• Gostas desta época do ano? Se sim do que mais gostas?
• Si, nesta época desfrutamos moitísimo, tanto do ambiente natalicio, do clima, coma das receitas típicas. 

Torta de chocolate e nata branquiazul

Amig@s lambonciñ@s, xa para ir rematando esta semana de múltiplas sorpresas, traemos unha torta de aniversario para unha pequena amiga que, como podedes ver, é moi moi deportivista. Por tanto, que mellor que decorar esta larpeirada con motivo branquiazul?
Xa levamos unha torta do Depor e outra do Barça, agardamos non perder lectores dos clubs rivais, haha. Mais eu penso que esta sobremesa merece ben a pena comela sexas do equipo que sexas, posto que mestura un biscoito de chocolate moi ben feito, moi esponxoso, cun dobre recheo de nata que o convirte nun manxar divino. Chocolate, nata... que máis pedir?
As obleas van ao gusto do consumidor e podédelas conseguir nalgunhas pastelarías, tendas de repostaría creativa etc. O sabor... ben, o mítico deste papel comestíbel, mais ornamentalmente fan unha achega importante ás tortas. Sempre queda a opción de debuxar a man esa decoración con fondant, mais... dá o seu traballo e desta volta non había moito tempo.
E que, apetece un bocado desta torta futboleira?

Torta de chocolate e nata branquiazul

Ingredientes: 

Para o biscoito:

• 4 ovos
• 1 vaso e medio de fariña 
• 1 vaso e medio de azucre
• Medio vaso de leite
• Medio vaso de aceite
• 2 culleradas de cacao en po 0%

Torta de cereixas

Xa por aquí de novo. Xa nos coñecedes así que non creo que vos estrañedes de ver unha nova torta en Bolboretas no bandullo xa que, a fin de contas, é o produto co que máis desfrutamos na cociña. Mais o feito de as presentar seguidas vén determinada polas datas en que nos encontramos. Sabemos que en grande parte da Galiza se celebra o San Xoán así que queremos darvos o maior número de ideas posíbeis para as sobremesas destas celebracións. Despois dun clásico como a Torta San Marcos, hoxe presentamos unha creación propia. Tiñamos un aniversario moi especial para o que nos encargaron unha torta que non levase chocolate. Ademais, a decoración tiña que ter algo de blaugrana pola paixón futboleira do homenaxeado. 

Despois de dubidar entre algunha que outra froita de tempada, acabamos por nos decidir pola cereixa, tanto polo sabor como pola cor vermella que harmonizaría esteticamente a torta. E realmente quedou moi ben integrada coa nata, logrando unha torta doce e para nada seca.

Iso si, quedaba a parte máis complexa, a da decoración. E aí, despois de pensarmos en utilizarmos unha oblea, acabamos por arriscar e probar sorte co fondant, a pesar de até agora non ter traballado en moitas ocasións con el. Foi un traballo complexo, sobre todo porque o fixemos con colorantes ao non termos fondant de tantas cores na casa. O resultado aínda que non perfecto si nos parece tan bo como para nos sentir orgullosos del. Iso si, desta volta tivemos a axuda dunha moi boa amiga na decoración sen a que sería posíbel tan bo resultado.

Torta de cereixas

Ingredientes:

• 1 biscoito xenovés (receita aquí)
• 800 gr de cereixas
• 600 ml de nata 35%
• 60 gr de azucre

Para a decoración:

• Fondant de cores
• 100 gr de améndoas

Galleta xigante

Chegou o Entroido!!!! Días de felicidade, moita festa e como xa dixemos unha e mil veces, de moitas larpeiradas!! Nós andamos dia tras día entre filloas, orellas, roscas e chulas, non perdoamos unha!

Porén, nesta última fin de semana tivemos unha celebracións cuns pouc@s amig@s así que levamos unha pequena sobremesa. Non nos merecía a pena unha torta desas das que comen moit@s, preferiamos algo máis pequeniño. Así pois, deunos por pensar en facer galletas, mais doutra forma, unificándoa nunha soa, para lograr unha galleta enorme da que tod@s retirarmos a porción correspondente. Certo é, que a receita orixinal é sacada da páxina de Alma Cupcakes, aínda que lle realizamos algunha que outra modificación.
Poucas veces veríades unha bolacha tan tan grande. Ademais, ao ser bastante grosa, acaba por ser bastante farturenta. A ver quen se atreve a comer esta galleta enteira!!

Galleta xigante

Ingredientes:

• 300 gr de fariña
• 170 gr de manteiga
• 115 gr azucre moreno
• 115 gr de azucre branco
• 75 gr de chocolate
• 1 ovo enteiro e unha clara
• 1 cullerada de vainilla
• 1 culleriña de lévedo
  

Cupcakes de crema de cacao para celíac@s

Nova receita e como hai que estar a todo pois tamén pensamos naquelas persoas que non poden degustar moitos dos produtos que aquí presentamos. Así pois, o doce de hoxe é especial para celíacos, mais xa vos aseguramos que non perde nin un ápice de sabor. Mesmo non soubo bastante máis que algunha outra vez que temos feito esta receita. O motivo da elaboración veu dado por unha nosa boa amiga que estaba de aniversario e que cada vez que vén de visitar hai que pensar en alternativas, e desta pensamos nunha sobremesa que non posuíse gluten e que estivese moi boa, e así chegamos a estes cupcakes. 

É a segunda vez que vos traemos este tipo de doces ao blogue, máis desta son especiais, e queremos mostrar que sen gluten tamén se poden facer auténticas marabillas, simplemente é cuestión de matinar un pouco máis nas posibilidades, xa que os produtos son máis reducidos. Certo é tamén que algún supermercados van mellorando e cada vez teñen máis recursos para celíacos mais outros aínda nolo poñen realmente difícil. Sexa como for, nós fixemos unha boa cantidade deles nun abrir e pechar de ollos foron desaparacendo da mesa. Xa queda anotado como óptimo recurso. Iso si, se tedes algún convidado celíaco e queredes sorpréndelo con algunha sobremesa destas, é moi importante confirmar que os produtos non leven gluten e que todos os utensilios utilizados non teñan restos de fariña. En caso de dúbida con algúns produtos, como nos pasou a nós, recomendamos procurar alternativas.

Cupcakes de crema de cacao para celíacos

Ingredientes:

• 200 gr de azucre moreno
• 120 ml de leite
• 100 ml de aceite de oliva
• 90 gr de fariña de arroz
• 90 gr de fariña de millo
• 3 ovos
• 1 sobre de lévedo en po
• 1 culleriña da vosa esencia preferida
• 80 gr de chocolate en anacos (apto para celíacos)
• Para a buttercream:
• 250 gr de manteiga
• 250 gr de azucre glas
• 200 gr de crema de cacao e avelás
• Para decorar: boliñas de chocolate, frores de azucre...

Piruletas de chocolate

Hoxe presentámosvos as piruletas de chocolate, tamén denominadas cake pops, que están moi de moda ultimamente converténdose nunha das lambetadas máis saborosas e orixinais, debido a que se poden decorar seguindo a imaxinación de cada quen, podendo incluso tinguir o chocolate branco con diferentes colorantes. Ademais son perfectas para festas infantís xa que aos máis pequen@s lles encantan pola súa forma e incluso el@s poden axudar a facelas e así se introduciren no mundo reposteiro. 

Piruletas de chocolate

Ingredientes:

• 1 biscoito pequeno (aproximadamente 300 gr)
• Nocilla (aproximadamente 250 gr)
• 1 barra de Chocolate negro 
• 2 barras de Chocolate branco
• Para a decoración: labras de chocolate, nubes, lacasitos pequenos, purpurina comestíbel...