Ensalada de quinoa

Bo día, bolboreteir@s! Que tal levades o inicio Outono? Xa vos apetece un tempo máis fresco? Nós estivemos o sábado comendo castañas asadas na praia 😂. Mais, mentres esperamos a que baixen as temperaturas, deixámosvos esta ensalada morna, cun toque thai, que, desde que a probamos, é un indispensábel todas as semanas na nosa casa. 

Ademais de estar boísima, dános xogo para reaproveitar eses ingredientes que nos quedan abandonados no frigorífico. De todas formas, aquí vos deixamos a nosa versión por se vos apetece probala. 

Ensalada de quinoa

Ingredientes:

• 
  300 g de quinoa
• Heura/polo
• 2 cenorias reladas
• 1 cogombro
• 1 cebola morada
• Millo ao gusto
• Coantro fresco

Para sazonar a quinoa:

• 1 cullerada de allo en po
• 1 cullerada de cebola en po
• 1 culleriña de comiño
• AOVE

Para a salsa:

• 50 g de leite de coco
• 1 cullerada de crema de cacahuete
• 1 cullerada de de salsa de soia
• 1 culleriña de mel
• 1 culleriña de allo en po
• 1/2 culleriña de xenxibre
• 1/2 culleriña de tomate concentrado
• Un chisco de lima

Utensilios: unha fritideira de aire, unha tixola, unha cunca grande, un bote pequeno, unha culler para mesturar, unha táboa e un coitelo.

Elaboración:

Para comezarmos, temos de sazonar a quinoa co allo, a cebola, o comiño e un pouco de AOVE. 

Mesturamos moi ben e levávola á fritideira de aire 30 minutos a 180º para que estea ben crocante. A metade da cocción debémoslle dar volta. 

Mentres tanto, aproveitamos para relar a cenoria e cortar o cogombro e a cebola. Botámola nunha cunca xunto co millo. 

Agregamos a quinoa crocante e a heura (ou polo), rustrida volta e volta na tixola. Mesturamos moi ben e reservamos mentres facemos a salsa. 

Para a salsa, temos de mesturar todos os ingredientes.

E botámoslle a salsa á nosa ensalada. 

Integramos ben a salsa co resto dos ingredientes. 

E rematamos a nosa ensalada cun pouco de coantro fresco. 

E xa estaría lista para comer!

Como vedes, é unha ensalada moi completa e moi fácil, e rápida, de facer! E unha forma deliciosa de introducir verduras e cereais na nosa alimentación.

Así que, esperamos que vos guste e que a poñades en práctica.

Aperta forte!

Lémonos, bolboreteirxs!