Brookie

Bo día, bolboreteirxs! Esta semana estamos moi felices xa que o próximo sábado imos facer un curso de Repostaría americana coa nosa admirada Alma Obregón, á que tantas veces recorremos para termos inspiración nas nosas receitas máis larpeiras.

E, tamén, para celebrarmos o inicio de outubro, o mes do Samaín, traémosvos unha lambonada demasiado deliciosa, e tamén moi moi sabedeira, unha mestura de brownie e galleta. Se nos seguides, xa sabedes que calquera das dúas sobremesas está moi presente en Bolboretas no bandullo, pois, desta volta, ocorréusenos facer unha mestura de ambas e engadirlle unha boliñas de chocolate e cacahuete para completar esta bomba de sabor. 

Brookie

Ingredientes:

Para o brownie:

• 300 gr de chocolate con leite       
• 300 gr de azucre
• 200 gr de fariña      
• 175 de manteiga
• 4 ovos
• 25 gr de cacao
• 1 culleriña de lévedo

Para a galleta:

• 250 g de fariña
• 150 g de azucre
• 110 g de manteiga              
• 1 ovo
• 1 cullerada de vainilla
• 3 g de lévedo
• 3 g de bicarbonato
• Un chisco de sal
• Chispas de chocolate

Opcional: bolas de cacahuete recurbertas con chocolate. 

 

Utensilios: dúas cuncas, un batedor manual/eléctrico, unha espátula, un molde apto para o forno e papel vexetal. 

Elaboración:

Para comezarmos, temos que facer as nosas masas, tanto a do brownie coma a da galletas. Se, coma nós, ides usar un batedor eléctrico con vaso, recomendámosvos facer primeiro a galleta, porque así xa podedes usar a mesma cunca para facer despois o brownie e que non quede todo impregnado de chocolate. Así, comezamos batendo a manteiga (fría e cortada en anacos) co azucre. 

De seguido, agregamos o ovo e a vainilla. 

Despois, a fariña mesturada co sal, o lévedo e o bicarbonato e mesturamos até ter unha masa homoxénea. 

Cando teñamos a masa perfecta, agregamos as chispas de chocolate. 

Reservamos mentres facemos a outra masa. 

Chegou o turno do brownie. Botamos o chocolate e a manteiga nunha cunca. 

Poñémolos ao baño maría ou no microondas até que derretan. 

De seguir, engadimos o azucre. 

E os ovos, un a un. 

Peneiramos a fariña, xunto co cacao e o lévedo. 

Mesturamos até que teñamos unha masa homoxéna. Reservamos. 

Chegou a hora de montar a nosa BROOKIE. Para iso, forramos un molde con papel vexetal e botamos a metade da masa do brownie e unhas boliñas de chocolate e cacahuete.

Imos cubrindo coa metade da masa da galleta.

E botamos o resto da masa do brownie. 

Rematamos con máis galleta e boliñas de chocolate. 

Enfornamos a 220º, calor arriba e abaixo, durante, aproximadamente 35-40 minutos. Debemos picar cun escarvadentes e comprobar que sae un pouco húmida. 

Deixamos que arrefríe un pouco. 

E xa estaría lista para comer! 

Como vedes, é unha lambonada ben saborosa e ben potente. Non ides deixar indiferente a ninguén, tanto pola textura como polo seu sabor. 

Así que, esperamos que vos guste e que a poñades en práctica.

Aperta forte!

Lémonos, bolboreteirxs!