Macedonia de froitas

Por sorte parece que volven subir as temperaturas, aínda que de momento ben se soporta a calor, haha. Sexa como for, neses días estivais de moita calor, convén hidratarse moito o que non se fai simplemente bebendo auga. Por tanto a nosa alimentación tórnase clave.

Así pois, nestes meses agardamos continuar presentando varias receitas que axudan a nos sentir mellor no verán. A de hoxe é todo un clásico e de seguro que a maioría de vós a ten feito en moitas ocasións xa que non ten a menor dificultade. Porén, como calquera prato de mesturas, ofrece millóns de variantes, e difícil será encontrar dúas familias en que a macedonia se faga de xeito idéntico. É cuestión de procurar o que preferimos encontrarnos nela. Nós por exemplo gustamos de macedonias, moi completas, con moitos froitos. 

Antes de pasarmos á elaboración queriamos mencionarvos a orixe desta denominación. Xa sabedes do noso interese por cuestións lingüísticas... Ao falarmos desta sobremesa, da macedonia, sempre nos vén á cabeza ipso facto o país balcánico. Mais... terán algo que ver?  De igual modo que noutras ocasións o imaxinario popular atribúe relacións lingüísticas do máis atrevidas, desta volta si anda no certo. Non no referido á macedonia de froitas en concreto senón ao termo "macedonia" xa que se coñecen así as combinacións de diversos produtos por causa do Imperio Macedónico. Na época de Alexandro Magno (século IV a.C), tiveron cabida neste imperio diversas nacións, culturas, idiomas... que provocou que hoxe coñezamos como macedonia as combinacións de produtos diferentes, sendo a de maior sona a de froitas.

E para que vaiades abrindo apetito... aquí tedes:

Macedonia de froitas

Ingredientes (para aprox. 10 racións):

• 5-6 laranxas
• 2 plátanos
• 2 kiwis
• 2 mandarinas
• 2 peras
• 2 mazás
• 10 amorodos
• 1/2 ananás

Cremas de ovo da casa

Un outro sábado e como xa sabedes, día de receita e como non, dunha nova larpeirada. Encaprichóusenos xa hai unhas semanas facer unhas cremas de ovo caseiras xa que normalmente comiamos as do super ou faciamos as de sobre. Así pois quixemos probar para ver as diferenzas, que si, existen. Unha sobremesa tradicional que gusta a tod@s e que ademais ten a vantaxe de ser apta para celíac@s, con non botarlle a cobertura de galleta abonda.

Nós, ademais fixémolas un pouco máis lixeiras, para pór un suave peche a un completo xantar ou cea. Así, de seguirdes esta receita notaredes que non son tan espesas como outras cremas de ovo. Iso si, se as preferides máis espesas redes que endadir unha pouca máis de maicena.

Como xa sabedes, esta dozura vénse denominando co nome español, natillas, mais xa vedes que esa terminación -illa é un pouco sospeitosa así que optamos por esta denominación, que nos dá máis confianza. Aínda que si, chamemos como lles chamamos están riquísimas. Ollade:

Cremas de ovo da casa

Ingredientes (para 8 natillas):

• 1 l de leite
• 200 gr de azucre
• 8 xemas de ovo
• 15 gr de maicena
• A monda dunha laranxa
• Un chisco de canela
• Para decorar (opcional): galletas
  

Galletas de avea, laranxa e anacardios

                                                            [...]                                                             

Mollo n'a propia sangre á dura pruma

Rompendo a vena inchada,
y escribo... escribo ¿para quê? ¡Volvede
o mais fondo da yalma
tempestosas imaxes!
[...]

24 de febreiro, día en que conmemoramos o nacemento da, posibelmente, figura máis relevante da historia da Galiza e non só a nivel literario. Non imos dedicar aquí o espazo merecente a Rosalía xa que non acabariamos nunca, mais si cómpre reivindicarmos a súa obra a cal convén lermos para coñecermos a verdadeira Rosalía e o seu valor literario e cultural, sempre preocupado pola Galiza e pola situación marxinal das clases populares, especialmente das mulleres. Os seus textos, escritos no XIX, teñen hoxe unha incríubel vixencia que mostra a nosa escritora como unha adiantada ao seu tempo e unha visionaria. Sempre Rosalía!!
Ademais, como gran coñecedora das tradicións galegas, deixa mencionado en varios dos seus versos algúns dos pratos típicos na altura, e que nos serven para sabermos algo máis dos costumes alimenticios dos galegos e galegas. Talvez o seu poema máis culinario sexa "¡A pobriña, que está xorda...!"
Deste tiramos versos de enorme interese gastronómico, alén de literario, claro:

Que hoxe, seica... seica... seica...

Torta de froitas

A de hoxe é unha torta, mais un pouco diferente xa que a pesar de ser moi moi saborosa é un pouco máis saudábel xa que está constituída a base de froitas. Talvez este sexa unha das melloras sobremesas para o verán, xa que nos axuda a refrescar, e actúa de complemento perfecto para un xantar ou cea lixeira.

Iso si, prestade atención a cantos sodes para comer, xa que esta torta, polas súas características, dura moi pouco. Os comensais van repetir xa que non farta nada e apetece moitísimo.

Torta de froitas

Ingredientes:

Para la masa:

• 175 gr de fariña
• 90 gr de manteiga
• 90 gr de azucre
• 4 ovos
• Unha culleriña de esencia de vainilla
• Un chisco de sal

Para o recheo:

• Crema pasteleira (receita aquí)
• 1 mazá
• 2 kiwis
• 1 laranxa