Pan de pasas e noces

Bo día, bolboreteir@s! Como vai? Aquí andamos de novo para vos traer un petisco que tiñamos ganas de preparar desde hai tempo. Este pan de noces e pasas é a nosa opción para este 17 de maio. E por que? Pois estamos relendo a Begoña Caamaño e imaxinamos este acompañante como ideal para os múltiplos banquetes que Penélope ofrece en Ítaca en tanto avanza a trama de Circe e o pracer do azul. O pan nunca faltaba nas cestas destes banquetes e adoitaba asociarse á grandeza do ser humano. Se ben é certo que era un pan máis denso que o que comemos aquí hoxe en día, era un manxar prezado e para o que había persoas (segundo se conta na Odisea) dedicadas a moer o gran para a fariña. 

Non temos constancia de que xa experimentaran con combinacións mais nós vimos este pan de noces e pasas como unha idea fantástica para entreter e sorprender os hóspedes que recibía Penélope. Imos ver que vos parece!

Pan de pasas e noces

Ingredientes: 

• 400 g de fariña de forza, máis 50 g extra
• 140 g de fariña de espelta integral
• 325 g de auga, máis un vaso extra   
• 25 g de mel
• 5 g de lévedo de panadaría en po
• Sal ao gusto
• 75 g de noces
• 75 g de uvas pasas

Utensilios: unha cunca grande, un batedor manual ou eléctrico, un pano, unha fonte apta para o forno e papel vexetal. 

Elaboración:

Para comezarmos, temos de mesturar as fariñas co lévedo e o sal. 

Tamén co mel. 

A continuación, agregamos a auga e amasamos até que todos os ingredientes estean ben integrados. 

Deixamos fermentar, aproximadamente, unha hora. 

Até que vexamos que duplica o seu tamaño. 

De seguir, nos pesamos a masa e dividímola en 5 boliños de, máis ou menos, 250 g. Tamén é unha opción facer unha soa peza. 

Estiramos a masa e botamos as noces e as pasas. Outra forma, sería integralos antes de que masa fermentase, e seguramente quedasen máis repartidos.

Pechamos os boliños e, de forma opcional, podemos facer unhas marcas cun coitelo. 

Prequentamos o forno a 220º, calor arriba e abaixo, e, cando metamos a bandexa, baixamos a 190º e botamos un vaso de auga no fondo do forno (tamén podedes meter un recipiente con auga dentro), durante 30-35 minutos. 

Deixamos que arrefríen un pouco e xa estarían listos para comer!

Na nosa casa triunfaron e duraron moi pouco tempo. A nosa imaxinación levounos a pensar neste pan para acompañar os manxares de Penélope. Podería ser luxo ben gozoso para humanos e deuses das illas gregas :-)

Agardamos que vos gusten e que poñades a receita en práctica.

Aperta forte!

Lémonos, bolboreteirxs!